Avûkata Halîse Aksoye Zeynep Karayilane ard ziwan ke vera Aksoye huqûqê dişmenî yeno caardene.

Dayîke Halîse Aksoye rixmê nêweşîyanê xo zî bi mengan o zîndan de sey rehîne tepişîyena. Avûkata aye Zeynep Karayilane ANFyî rê tayê ercnayîşî kerdî.

Avûkate Karayilane vist vîrî ke dayîke Halîse 25ê nîsane de bi beyananê îtîrafkerî tepişîyabî û vat: “Îtîrafkerî îdîa kerd ke Halîse Aksoye endamê rêxistine girewtêne keyeyê xo û rêxistine rê ardim kerdêne. La îfadeyê îtîrafkerî nakok ê. La mehkeme na nakokîye qebul nêkerde û vat ke şahîdê eşkerayî ra ber şahîdêkê/a nimite zî est o/a. Coka mehkeme Halîse Aksoye vera nêdaye. Xora zereyê huqûqî de yew bingeyê na bire çin o.”

Avûkate Karayilane îfade kerd ke destpêkê prosesê muhakemekerdişî ra nata vera Dayîke Halîse huqûqê dişmenî yeno caardene û vat: “Dosya de îfadeyê hîrê şahîdan est ê la mabênê îfadeyanê nînan de yew eleqe çin o. Hetê bînî ra îdîaname de qala lajê Halîse Aksoye Egîd Îpekî zî yena kerdene. Bi sereyê xo na rewşe mojnena ke verê Halîse Aksoye de nêzdîbîyayîşêko bêusûl est o. Halîse Aksoye 9 mengî yo zîndan de ya û tede şeker û tansîyon est ê û nêweşîyê bînî est ê. A zîndanî ra çend reyî wedarîyaye nêweşxaneyî. Pêvînayîşê ma yê peyênî de aye vat ke nêweşîyê ci giran bîyê.”

Karayilane pê hesna ke 12ê çeleyî de (siba) roniştişê dewaya vera Dayîke Halîse est o û vat: ”Ganî ma wayîrê nê roniştişî bibê. Ma sey avûkatanê Halîse Aksoye do uca de amade bibê. Ma venga pêro dezgehan û rêxistinanê demokratîkan û cinîyan danê ke tewrê roniştişî bibê û paştî bidê Halîse Aksoy.”