2023 de cenî taybet kî cenîyanê kurdî têkoşînade pîle daye. Cenîyan bi sloganê ‘Cenî, Cuwa, Azadîye’ estê xo ver. Serva ca ardena şoreşa cenîyan emegêde pîlî danê. Zerrê çeyan ra heta kuçeyan her cayê ciwîyayîsî de verra hêrişan, bi qûweta xo ya vindertî. Cenîyê kurdî her cayê Kurdistanî de verra sîstema camêrdî vindertî. Eke cenî wazenê bixeleşîyê, têdustîya weşîye bikerê, têkoşîne, xoverdayene ra qeyir kî raye çîn a, naye kî rind zonenê.
Tecawuz ra heta kistene, verra cenîyan polîtîkayê qirkerdene, bêvengkerdene yenê ramitene. Doman yan kî pîl ferq nêkeno. Qilêrîye zerrê qomî de axme kenê. Her roz cenî bi babetanê ciya ciyayan rastê hêrişê camêrdan yenê. Hama ma zonîme camêrdî na qûwete kot ra cenê. Îqtîdar bi qeseyanê xo, bi hedefmusnayene pêro nî hêrişan rê raye keno ya.
Teyan verra cenîyan nî verra kurdan hêrişê qirkerdene, kokardene bêmaven dewam kenê. Çitur ke rejîma qirkerdoxe bi her çî yena şarî ser, canê cenîyan cena, dustê naye de pêro pîya, bi jû qûweta vinitis, bi jû venga vejîyayîş, her waxt ra jede muhîm a.
Kurdistan de pêro qomî ser hêrişê qirkerdene yenê ramitene. Ma ke teyna rojdemê emserî de nîya de, zelal werte der o, kurdan ser o çik ferz kenê. Wazenê qomê kurdan qir bikerê, axmeyê dugelan bikerê. Nêwazenê qomê kurdan hardê xo de biciwîyo. Ne zonê kurdan, ne kî kamîya kurdan qebûl kenê. Emser verva Rojawanê welatî hêrişê giranî bîyî. Nî rozanê peyênan de kî nî hêrişan dewam kerd. Şoreşa ke Rojawan de vejîye werte, bi bedelanê giranan vejîye werte. Bi hazaran şoreşgeran bi canê xo awe daye şoreşe, kerd gewe, kerd pîl. Nika na şoreşa ke bi Şoreşa Cenîyan a yena namekerdene, hetê rejîma faşîste ra yena hedefguretene. Bi na şoreşa verra sîstema netew-dewlete sîstemade neweyî ya komelkî vejîye werte, bi emegê na sîsteme roz bi roz cayê xo kerd qayîm. Wazenê na sîsteme werte ra wedarê. Nêwazenê ke şaro kurd jû cayî de gorê sîstema demokratîke ciwîyayîsê xo biramo. Nêwazenê kurdî gorê heqanê xo ciwîyayîsê xo bi şaranê bînan a biramê.
Ebi bendan hardê Kurdistanî zaf cayan de binê awe de veradîya. Serre şîye serre ser, madenî vejîyayî werte, bendî qişkek-girs her ca de ameyî ronayene. Nika kî zaf cayan de hardê şarî serva petrolî dest ra cenê. Efrîn kurdan ra kerdî tol, îşxal kerdî, nika kî çeyan virazenê. Kurdan ra qeyir kam ke est o gorê xo anê Efrîn de ca kenê. Efrîn bicerîme heta Şengal, Maxmurî her ca de kurdî ke azadîya xo wazenê înan ser o hêrişî dewam kenê.
Dewleta qirkerdoxe her ca de hêrişan dana ramitene. Hama beno ke serra 2024î jedena giran kî bibo. Dewleta tirke xo ra serran ave Planê Çokdayene kerd amade û no kî planê qirkerdene, qetlîyamî bî. Coka yeno vatene, têkoşîn û xoverdayene ra qeyir raye çîn a. Eke virnîya nî hêrişan nêro guretene, kurdan rê teyna kolebîyayene manena. Yan zerrê welatî de yan kî teberê welatî de. Serra neweyî dayikî bi çalakîya vernîyaz kenê. Çond cayan de verra tecrîdê giranî dayikî virnîya nûmayîsan oncenê. Onca hepisxaneyan de cenî bi vinitisê xo nî polîtîkayan tol vejenê. Rojawan de binê bombeyan de cenî her roz şîyayîsan der ê. Vanê; welatê azadî wazenîme, ya merdene ya kî azadîye. Nê qeseyî ser kî vatena qeseyî ya bîne nêbena. Emser serrade girane bîye, omed kenîme serra neweyî bibo serra serbestîye.
