Hemşaredara Nisêbînî Semîre Nergîza ke herinda ci de qeyûm amebî tayînkerdene ard ziwan ke Nisêbîn qezaya xoverdayîşî ya û wina vat: “Şiknayîşê îrade û bêmanaverdayîşê nasnameyî asan nîyê.”

Semîre Nergîze bale ante sîstemê hemşaredarîye ser û vist vîrî ke hemserekîye hêverî Nisêbîn de amebî caardene. Semîre Nergîze vat: “Binê şaredarîya ma de serkêşîya Ayşe Gokkane û Sara Kayayane de dezgehê cinîyan ameyî akerdene û xebatê cinîyan ameyî kerdene. Qeyûman wexto ke ameyê hêverî nê çîyî kerdî hedef. Heta ke qeyûm tayînê Nisêbînî bîbî ma 6 mengan de xebatê weşî kerdî.

A raşte ma waştêne hîna zaf çîyan bikerê. Panc serran qeyûm şaredarîya ma de bî, dima ma weçînayîşan de ancî qezaya xo Nisêbînî viste destî la şeş mengan ra dima ancî dest nîya erkê ma ser. Ma projeyê xo yê seba 5 serran amade kerdbî. Qeyûmî pêro şaredarîyê ma talan kerdî. La Nisêbîn qezaya xoverdayîşî, polîtîk û wayîrê tewir û rengî ya. Şiknayîşê îrade û bêmanaverdayîşê nê nasnameyî asan nîyê.”