Tepişteyê sîyasîyî yê ke Zîndanê Tîpê Fyî yê Kurkçuler de yê, seba ke Îmraliyî rê bêrê sewqkerdene her hewte muracat kenê.

Grevê vêşanîye yê tepişteyan ke semedê azadîya Serekê PKKyî Abdullah Ocalanî dîya destpêkerdene, roja 37. de dewam keno. Tepişteyê sîyasîyî yê ke Zîndanê Tîpê Fyî yê Kurkçuler de yê, seba ke Îmraliyî rê bêrê sewqkerdene her hewte muracat kenê.

Tepişteyanê sîyasîyan ra Ahmet Herdem (36) ê ke pê telefonî keyeyê xo de qisey kerd, vat semedê şiknayîşê tecrîdî ê her hewte semedê sewqê Îmraliyî muracat kenê.

Herdemî wina vat: “Serê Rayberîye de tecrîdêk est o û vera nê her warî de xoverdayîş est o. Ma sey Tîpê Fyî yê Kurkçulerî grevê vêşanîye de yê. Ma 5 rojî sey bidorî kewenê grevî. Ma pêro embazî seba ke tecrîd bêro şikitene her hewte semedê sewqkerdişê Îmraliyî muracat kenê. Ma her hewte waştişê xo yê şîyayîşê cayê Rayberîya xo newe kenê.”