Hetkarê Hemserekanê DEM Partî Ozturk Turkdoganî da zanayene ke hukmatê tirkî qanûnê înfazî nêano ca û wina qisey kerd: “Tîya de yew bêqanûnîye est a. Birêz Abdullah Ocalanî ser yew îzolasyono giran est o ke tecrîdî ra wetêr o. Na bêqanûnîye ya.

Turkdoganî vist vîrî ke înfazê qanûnî yo ke ê tim rexnê kenê, o zî pêvînayîşê avûkatan û keyeyî tim asteng nêkeno û vat: “Tîya de yew bêqanûnîye est a. Birêz Abdullah Ocalanî ser yew îzolasyono giran est o ke tecrîdî ra wetêr o. Na bêqanûnîye ya. Xora bêqanûnîye Îmrali de dest pêkerd. Nika qerarê mehkemeya qanûnê bingeyî nênî caardene. Eke şima vera bêqanûnîye mevejîyê xora rewşe wina xirabe bena.

Ewro tepişteyî vera tecrîdî grevê vêşanîye de yê. Waştişê wedaritişê tecrîdî waştişêko heqdar o. Xora zîndanan de binpaykerdişê heqan ê bînî zî est ê. Zîndanê Tirkîya tim bi grevanê vêşanîye rojdem de yê. Eslê xo de mesele têna tecrîd nîyo, heme heqê tepişteyan yenê binpaykerdene.”

Turkdoganî bale ante ziwanê şerî yê hukmatî ser û nê vatî: “Ganî no ziwan bêro caverdayene û ziwanê aştîye bêro qalkerdene. Hukmat wazeno bi sîyasetê pêkewtişî îqtîdar de bimano. Coka Tirkîya kirişta kiştê kaşî. Çimeyê ekonomîkî yê Tirkîya ameyî xerckerdene, krîzêko sîyasî est o. Qanûnê bingeyî yê Tirkîya nêno caardene, Tirkîya vejîyaya teberê huqûqî.

Problemêko pîl est o û çareserkerdişê ci rehet nîyo. Ma sey DEM Partî sîyasetê aştîye rayra benê. Tayê tim kenê ke ma biancê mîyanê pêkewtişan. Dewlete heta ewro semedê çareserkerdişê meseleya kurdan pêro gamî serê Abdullah Ocalanî ra eşt ê. Ma vanê ke tecrîd wedarê û verê prosesê aştîye abikerê.”