DEM Partî îşkenceyê vera ciwananê kurdan şermezar kerd û wina vat: “Ganî embazê ma yê ciwanî cade vera bidîyê. Ganî îqtîdar xo vîr ra nêkero ke bedelê ci se beno wa bibo ma do aştîye bîyarê ca û têkoşînê seba çareserîya meseleya kurdan rê dewam bikerê.”

Heyetê Rayberdişê Merkezî (MYK) yê DEM Partî bi eşkerayîyêke vera hêrişanê serê Meclîsê Ciwanan nêrazîbîyayîşê xo mojna.

Eşkerayîye de wina ame vatene: “Vizêr Amed de kongreya Meclîsê Ciwanan ê partîya ma ra dima destbendkerdiş, tepiştiş, îşkence, remnayîş û bi her hawayî metodê teda ameyî kerdene. Seke Hemserekê ma Tuncer Bakirhanî zî dabî zanayene ke seba çareserîya meseleya kurdan ma amade yê ke mesuldarîye bigêrê xo ser û fedakarîye bikerê. La Kongreya Meclîsê Ciwanan ê partîya ma bi fermanê Wezîrîya Edaletî gêrîyaye binê tehqîqatî û hêzanê îqtîdarî hêrişê embazanê ma yê ciwanan kerd. Tewr peyên 60 embazê ma bi îşkenceyî ameyî destbendkerdene. Ma îşkenceyê vera ciwananê ma bi şîdetî şermezar kenê. Armancê nê hêrişan no yo ke verê çareserîya demokratîke ya meseleya kurdan bêro girewtene.

Ma venga pêro kesanê ke zerrîya ci dejena danê ke vera sîyasetê merdeyan û şerî yê îqtîdarî tewirê xo bimojnê. Ganî embazê ma yê ciwanî cade vera bidîyê. Ganî îqtîdar xo vîr ra nêkero ke bedelê ci se beno wa bibo ma do aştîye bîyarê ca û têkoşînê seba çareserîya meseleya kurdan rê dewam bikerê. Ma do verê mergan bigêrê û qetî ser bikewê.”