Aşma kanûne, tarîxê dewleta tirkan de tarîxo tewr girîng o. Şaranê Tirkîya û Kurdistanî 17-25ê kanûna 2013î de serê sibayî skandalêkî rê şahîdîye kerde. Vera xeylêk merdimanê dewlete operasyonê rişwet û bêrayîrîye dest pêkerdbî. Mîyanê merdiman de wezîrî zî estbî. Nê operasyonî vengêko gird vetbî. Eke operasyonî rê destûr bidîyêne, Erdogan û lajê ci ameyêne muhakemekerdene. Labelê cergan seba ke hesab nêdê huqûq kelemçe kerd.

Têna Tirkîya de nê, beno ke pêro dinya de dizdîya winayêne nêqewimîyaye. O wext tayê tapeyî weşanîyayî. Goreyê nê tapeyan Erdogan serekê “torra bêrayîrîye” de bî. Ey demê operasyonî de lajê xo Bîlal Erdogan gêra û ci rê vat ke “peran werte ra wedarne!”. Yanî Erdoganî keyeyê xo tewrê sîyasetê xo yê lêşinî kerdbî. Ey ferman dayo, wezîranê ci rişwet girewto û dizdîye kerdo. Mîyanê kesanê ke bêrayîrîye kerde nê nameyî est ê: Wezîrê Yewîya Ewropa Egemen Bagiş, Wezîrê Karanê Zerreyî Muammer Guler, lajê ci Bariş Guler, Wezîrê Ekonomî Zafer Çaglayan, lajê ci Kaan Çaglayan, Wezîrê Dorme û Bajarawanîye Erdogan Bayraktar, lajê ci Oguz Bayraktar, merdimê karî Reza Sarraf, Alî Agaoglu, Mudiro Pêroyî yê Halkbankî Suleyman Aslan ûsn.

Erdoganî asteng kerd

Bitaybetî nê operasyonî de pozîsyonê Bîlal Erdoganî xeylê balkêş bî. Dozger Muammer Akkaşî seba îfadedayîşî veng da Bîlal Erdoganî. Labelê Mudirê Pêroyî yê Asayîşî yê Stenbolî Selamî Altinokî asteng kerd. Dima ra Wezîrê Karanê Zerreyî yê Newî Efkan Alayî dormeyê banê Erdoganî de tayê tîmî ca kerdî ke kes nêro destbendkerdene. Wina aseno ke Erdoganî ferman da û kerdişo huqûqî asteng kerd.

Dîvan qestî nêronîya

Wezîrê ke bêrayîrîye kerdbî yew bi yew îstîfa kerd. Labelê înan ra çew nêame muhakemekerdene. Ganî yo ke dîvan biameyêne ronayene û 4 wezîrî biameyêne muhakemekerdene. Labelê “partîya xapxapokan” no proses qestî asteng kerd. Çike înan Erdoganî ra ferman girewt. Partîye de têkilîya “îmam-cematî” est a. Îradeyo azad çîn o. Erdogan “şêx” o, parlamenterê AKPyî “murîd” ê. Erdoganî xo ra tersayêne, coka nêwaşt ke hemkarê ci bêrê muhakemekerdene. Xo ra wezîrê ci Erdogan Bayraktarî wina vatbî: “Planê awanî yê ke dosyaya tehqîqetî de est ê bi fermanê serekwezîr Erdoganî ameyî tesdîqkerdene. Bi nê hawayî ez eşkera kena ke karê wezaret û parlamenterî ra îstîfa kena. Seba asankerdişê şar û welatî ez bawer kena ke serekwezîr ganî yo ke îstîfa bikero.”