Nameyê Partîya Demokrasî û Têdûştîye ya Şaran vurîya bi ‘DEM Partî.’

Vervatoxa Partîya Demokrasîyî û Têdûştîye ya Şaran (HEDEP) Ayşegul Dogane derheqê nameyê partîye yê kilmî de Merkezê Pêroyîyî de kombîyayîşê çapemenîye kerd.

Ayşegul Dogane kombîyayîş de ard ziwan ke şertanê mecburîyan ra înan nameyê xo yo kilm vurnayo û vat: “Mehkemeya Berze ya Temyîzî waştbî ke seba ke HEDEP maneno ‘HADEP’ ma nameyê xo yê kilmî bivurnê. La HADEP rew ra amebî qefilnayene. Nê prosesê weçînayîşan de ancî bi na bahane ame waştene ke wa verê ma bêro girewtene. La ma do rixmê nê kayan û dafikan zî rayîrê xo ra dewam bikerê.

Mehkemeya Berze ya Temyîzî waşt ke ma nîzamnameyê xo de zî tay vurnayîşan bikerê. La ma nîzamnameyê xo qetî nêvurna. Nameyê partîya ma yo kilm naye ra pey ‘DEM Partî’ yo. DEM yeno manaya wext, nefes, qisey û hele coka no name ma terîf keno. Ma do her dem estbîyayîşê xo bidê hîskerdene.

Tay rojî mendê ke ma do qeyûman bierşawê. Seba eleqeyê pîlî ma wextê muracatê vernamzedîye heta 20ê kanûne derg kerd. Sey DEM Partî ma venga her kesî danê ke nê rayraşîyayîşî de ma hetî de têkoşîn bikero. Wa cinî û ciwanî hêverî muracat bikerê. Ma do heta 20ê kanûne îradeyê xo yê xurtî bimojnê rejîmê qeyûman.”