Wexto ke payiz yeno, hedî hedî heme cayan de tedarîkê zimistanî dest pêkeno. Amed u qezayane Amedî de roc bi roc semedê zimistanî tedarîkê her çîye ku zimistanî yeno werdene dîyeno. Derûdorê Amedî de rezî zaf est ê. Rez bi arêdayîşê engure dest pêkeno. Bastêq, dims, helawî u kesme; bi viraştişê nê werdan rez darîyeno we. Bav û kalan senîn ke ê musnayî, ê zî bi no hawa domnenê. Cenî û camêrd, pîl û qic her hetî ra bi xebateka kolektîfe pêro pîya mîyan de şixulîyenê. Wextê verînan de kal û pîran têverê gencan bi destan her çî viraştê.

No zeman de gelo teknolojî ma vînî keno yan ma aver beno? Ma vînenê ku henî kes sinetê bav û kalan dima nêşino. Bi teknolojî karê xu domneno. Verê coye helawî bi di kesan, bi tadayîşê milan û destan virazîyêne la nika bi makîna virazîyeno. Helawî çi yo? Beroşanê pîlan de dims girênenê û ardan danê pêro, hedî hedî têv danê. Adirê tayî de bi saetan têv danê, heta ku ê ardî û dims yewbînî bigêrê û bibê sey benîştî. Ardî mîyanê dimsî de nêrê girênayene, aye ra di merdimî ser o vindenê, tadanê û serobin kenê. Cenîyî eyarê ardan virazenê, tay zaf ê qerar danê. Camêrdî zî eger helawî zaf bo, dewr kenê. Kam bibo rincan, o serê ra wurzeno ra û yewbîna kes yeno. Çok şaşenê erd û beroşî ser o vindenê. Peynî de pêro pîya ewnîyenê, eger helawî bîya sey benîştî, beroş ra vecenê û kenê çîngoyanê bi qapaxî û darenê we. La nika şaro ku biwazo hetanî amnanî biwero, nê helawîyî kenê dolaban u cemednenê. No zî reyna teknolojî ra feyde vînayîş o. Ma vînenê ku teknolojî rehetîye ano, la hetê bînî ra çîyo ku verînan ra dewr bîyo keno vînî. Hetêk ra rehetîye virazeno, hetêk ra tarîx beno vînî. Gencî nika nê şixulî ser o nêvindenê û nêwazenê. Înan rê giran yeno. Eger dewan ra nêbo, bav û kalan ra nêbo, pîrik û mayan ra nêbo xura nê şixulî kes nêkeno. Bi xeyrikanê teknolojî gencî zerî kenê û hema zî no sinet domîyeno. Averbîyayîşê teknolojî ma ser o tim tesîr keno, emegê destan vînî beno la rehetîya pîle virazîyena. Zemanê verînî de wextê rezan de merdimî ameyêne têhet û bi aşman rezan ser o mendêne. Arêdayîş û esarnayîş tenê bi rocan domnayêne. Esarnayîşê engure bi lingan bîyêne. Dima ra şîre û girênayîş çend rocî zî beroşî ser o vindertêne. Badê ceyo bastêq, helawî, kesme û sewbîn çî biwaştêne, o viraştêne. Nika şaro ku biwazo nê çîyan bivirazo sere de engure dano arê û dano makînan ro, şîre bixu vecîyeno. Hewce nêkeno ku merdimî zaf bibê. Bi di-hîrê têna beno. Zehmetîya pîle bastêq û helawî de vînenê, helawî zî hene rehet virazîyena. Bi makînaya mîkserî merdimêk tenê eşkeno bivirazo. Beroşî ser o vindeno û makîna bixu tadano. La merdimê pîlî reyna ser o vindenê û heta ku zerreyê înan rehet bo, o wext qerar danê. Makîna zerreyê înan rehet nêkena, la rehetîya pîle dana neslê ekayîn rê.

Ma vînenê ku teknolojî rehetîye dano û neslê newî rê hetkarî keno. Eger kal u pîrî çîne bê, kes nêeşkeno sey înan nê karî aver bero.