Avûkat Rêzan Saricayî ard ziwan ke seba tepişteyan têkilîya bi komelî zaf girîng a û wina vat: “Ganî tepişteyî bi rayîrê telefon, mektub û rayîranê bînan tim bieşkê teber de têkilîye virazê. Nê heqê Birêz Ocalanî bi temamî yenê astengkerdene û qedexekerdene.”
Saricayî ard ziwan ke sîstemê Îmraliyî de Heyetê Dîsîplînî, Heyetê Îdare û Çimdarîye, Mehkeme û Mehkemeya Îngazî bi rayîr û metodanê cîyayan ceza ferz kerda. Saricayî vist vîrî ke dewlete herinda cezaya îdamî de cezaya muebede ya girane daya la pê ney zî qîm nêkerdo. Saricayî vat: “Dewlete kena ke her hela Birêz Ocalanî bivurna ezîyetî.”
Saricayî vist vîrî ke serra 2011î ra nata pêvînayîşê bi keye û avûkatan yenê astengkerdene û vat: “2011 ra nata 5 pêvînayîşê avûkatan ameyî kerdene. 9 serrî yo keyeyî de teyna 5 reyî pêvînayîş kerd. 25 serran de Birêz Ocalan teyna di reyî eşka heqê xo yê telefonî bişuxilno. Reyna kitab û kovarî nêdîyenê Birêz Ocalanî. Destpêk de televîzyon dîyabî ci la dima teyna yew kanalî rê destûr dîya. Dima no zî wedarîya.”
Saricayî pare kerd ke sîstemê cezakerdişî yo ke 25 serrî yo dewam keno, zerar dano ruh û fîzîkê merdiman. Saricayî vat: “Seba tepişteyan meseleya tewr girînge têkilîyê bi cuye û komelî yê. No zî bi zîyaretanê keyeyî, avûkatan û merdiman, dostan beno. Ganî tepişteyî bi rayîrê telefon, mektub û rayîranê bînan tim bieşkê teber de têkilîye virazê. Nê heqê Birêz Ocalanî bi temamî yenê astengkerdene û qedexekerdene. Sîstemê Îmraliyî yo ke 25 serrî yo dewam keno xora zerar bido fîzîk, psîkolojî, ruh û mezgê Ocalanî. Yeno waştene ke Birêz Ocalan hetê fîzîkî, ruh û mezgî ra bêro teslîmgirewtene. Metodê cezakerdişî yê Îmraliyî ganî sey hêrişê vera fikr, qiseykerdiş û berardişî bêro ercnayene.”
