Goreyê dayeyanê CPTyî 1ê çeleyê 2023yî ra nata Başûrê Kurdistanî de 10 sîvîlî bi destê dewleta tirkan ameyî qetilkerdene.

Goreyê eşkerayîye mabênê 1ê çeleyê 2023yî û 17ê teşrîna verêna 2023yî de hêrişanê dewleta tirkan de 10 sîvîlî ameyê qetilkerdene û 12 kesî zî birîndar bîyê.

Goreyê eşkerayîye 6 sîvîlî bi droneyê çekdarî, 3 sîvîlî bi hêrişanê hewayî û 1 sîvîl zî bi mayînî ameyî qetilkerdene. 2 sîvîlî bi guleyan û 1 sîvîl bi mayînî birîndar bîyî.

CPTyî vat: “Artêşa tirke nîsana 2022yî ra nata qasê bi seyan kîlometreyan dekewta erdê Başûrê Kurdistanî. Dewleta tirkan teyna gerîlayanê PKKyî ney hemwelatîyan, citkaran û dewijanê Başûrî kena hedef.”

Dewleta tirkan 2016 ra nata hêrişanê xo yê vera Başûrê Kurdistanî de tewr tay 600 sîvîlî qetil kerdî.