Serekê PKKyî Abdullah Ocalan 9ê teşrîna verêna 1998î de Sûrîye ra vejîya. Dewletanê serdestan mîyanê xo de hemkarîye kerde. Ocalan netîceya “komploya çarmixî” de ameye tepiştene. Nêzdî 25 serrî yo vera faşîzmî xover dano
Serekê PKKyî Abdullah Ocalan 25 serrî ra ver Sûrîye ra vejîya û 5 aşmî ra pey ame tepiştene. Mîyanê nê 5 aşman de vera ey komployê gemarinî ameyî serûberkerdene. Xora o bixo na komploye sey “komploya çarmixî” pênas keno. Bêguman Ocalanî Rojhelatê Mîyanênî de tayê kayê serdestan xeripnayî. Coka o ame hedefgirewtene. Sere de Amerîka, Rûsya, Tirkîya, Yewnanistan, Îtalya tewrê na komploye bîyî. Na komple têna vera yew merdimî nêbîye, vera “entîteyê” şarê kurdî bîye. Çike armanco serekeyî yê Ocalanî azadîya kurdan bî. “Fînîs ultîmîs” xoserkerdişê pêro kurdan bî.
Birastî bingeyê komploye serra 1994î de ronîya. A serre Serekê Amerîka Bîll Clînton şî Sûrîye û pê Hafiz Esedî pêvînayîş kerd. Nê pêvînayîşî fekafek 4 saetî dewam kerd. 3 saetanê ci de nameyê Ocalanî ame nîqaşkerdene. Amerîka Ocalan sey tehdîtêko gird hesibna. 2 serrî tepîya Şam de vera Serekê PKKyî pê wesayîtêkî ye ke tede bombayî amebî barkerdene hewldayîşê suîkastî virazîya. Dima ra Ocalanî ser o tedayî zêdîyayî.
Mutabaqatê Adana
Nê serran Tirkîya zî vera Ocalanî tayê hewldayîşî kerdêne. Hamnan 1998î de aşma temmuze de Heyetê Asayîşî yê Neteweyî (MGK) kombîyayîşêk kerd û rewşa PKKyî ya Sûrîye nîqaş kerde. O wext vera Ocalanî zî qerarê komploye gêrîya. Çend mengî dima 16ê êlula 1998î de Fermandarê Hêzanê Bejî General Atîlla Ateşî vatbî ke ê do pawitişê Ocalanî yê bi destê rejîmê Esadî sey sebebê şerî bihesibnê. Dewleta tirkan ferz kerd û peynî de Serekê PKKyî Sûrîye ra 9ê teşrîna verêne de vejîya. Wirdî dewletan 20ê teşrîna verêne de qezaya Seyhanî ya Adana de mutabaqatêk îmze kerd. Serekkomarê Misirî Husnu Mubarekî zî seba pêvînayîşan mabênkarîye kerdbî. Goreyê mutabaqatî Sûrîye do aktîvîteyanê PKKyî asteng bikero û Ocalanî rê seba erdê Sûrîye destûrê dekewtişî medo.
Yewnanistan de dafike
Ocalan Sûrîye ra vejîya û heman roje de şî Yewnanistan. Di rayirê ci estbî. Yan ko yan zî Ewropa. Ey waştêne ke şêro Ewropa û uca de derheqê persa kurdan de rayapêroyî virazo. Labelê Yewnanistan de baş nêame pêşwazîkerdene. Xora Ocalan nuseno ke o hetê Amerîka, Îngilîstan û Yewnanistanî ra ginabî zerreyê dafike. Rixmo ke Yewnanistan de îltîca waşt, waştişê ci qebul nêbî. Îdareyê yewnanan qanûnî binpay kerdî û Ocalanî rê gefî wendî. Wezîrîya Karanê Teberî ya Yewnanistanî teyarayêke akort kerde û Ocalan şî Rûsya.
Rûsya leteyê komploye bîye
Xebatkaranê Asayîşê Rûsya teyarageh de Ocalan pêşwazî kerd. Verî şî keyeyê Serekê Partîya Lîberal û Demokratîke Vladîmîr Jîrînovskîyî. Dima ra ame berdene keyeyo ke serê koyî de bî. Ocalanî eynî wext de seba îltîca beşdarîya xo kerde. Duma de raydayîş qewimîya. 298 parlamenteran tesdîq da, yew parlamenterî red kerd. Rixmo ke duma de îltîca qebul bîye, serwezîr Yevgenîy Prîmakovî qerarê dumayî nêhesibna û Ocalanî rê tebervejîyayîş ame ferzkerdene. No nêzdîbîyayîş qanûnî nêbî û tayê şikî afernayî. Yeno fikrîyayene ke Prîmakovî fermanê Amerîka ard ca. Çike mabênê sinifa sermaye û îdareyê Yeltsînî de têkilîyê menfaetî estbî. Na çarçewa de Ocalan nuseno ke Vervatoxê Wezîrîya Karanê Teberî ya Amerîka James Rubînî hukmatê Rûsya ra îxracê Ocalanî waşto.
Ewropa vatişê Clîntonî kerd
Serekê PKKyî 33 rojî Rûsya de mend. Seba îltîca Îtalya reyde tayê têkilîyî viraştî. Bi Parlamenterê Partîya Komunîste ya Îtalya ya Newe ra Ronîyayîşî Ramon Mantovanî qisey kerd. Bi no hawa 12yê teşrîna peyêna 1998î de şî Îtalya. Labelê uca de zî asan nêbî. Çike hukmatê Bîll Clîntonî Îtalya rê teda kerdêne ke Ocalanî rê qetî ca nêdo. Hukmatê Massîmo D’Alemayî zêde deyax nêkerd. Almanya û Fransa zî binê tedaya Amerîka de mendî û Ocalan qebûl nêkerd.
Ver bi 15ê Sibate
Netîceya kayanê Amerîka, Ocalan fina şî Rûsya. Uca ra ame berdene paytextê Duşanbe yê Tacîkistanî. Tîya de nêzdî 10 rojî mend. Ocalan vano ke Duşanbe de raştê şertanê xiraban ame. Armancê ci şîyayîşê Kurdistanî bî. La armanc nêame caardene. Ocalan reyna şî Yewnanistan. Tîya de dafikêka girde amebî serûberkerdene. Ci rê ame vatene ke şêro Kenya. Goreyê sozanê hukmatê Yewnanistanî Ocalanî yo Kenya de pasaportê Komara Afrîkaya Başûre bigirewtêne û bişîyêne uca. Labelê wina nêbî. Tirkîya, Yewnanistan û Amerîka pîya komplo amade kerde. Fînans kapîtalî 15ê sibate de Kenya de Serekê PKKyî Abdullah Ocalan teslîmê Tirkîya kerd. A roja ra heta nika Girawa Îmrali de xoverdayîşêkê bêhempayî rê dewam keno. Tecrîdo ke serê ey de yeno caardene, birastî serê şarê kurdî de yeno caardene. Kolonyalîstî wazenê azadîya Kurdistanî asteng bikerê. Labelê nêzanê ke “awa derya bi şimitişî nêqedîyena”.
