Hefteya borî Artêşa Azerbeycanê bi sorkirina Tirkiyeyê li dijî Qerebaxê dest bi operasyoneke nû kiribû û li ser destpêka hevdîtinên di navbera aliyan de operasyon hat rawestandin û agirbest hat îlankirin. Hevdîtinên di navbera Azerbeycan û nûnerên Qerebaxê de hê jî bi encam nebûne.

Şêwirmendê Serokê Qerebaxê Davîd Babayan, der barê geşedanên dawîn ên herêmê de ji Reutresê re axivî û diyar kir ku ermenên li Qerebaxê ji ber ku naxwazin di bin kontrola Azerbeycanê de bijîn û ji jenosidê bi fikar in wê biçin Ermenistanê.

Babayan der barê mijarê de ev tişt got: “Gelê me naxwaze wek beşeke Azerbeycanê bijî. Ji sedî 99.9`ê wan dixwazin axa xwe ya dîrokî terk bikin. Ne zelal e kengî 120 hezar ermenên Qerebaxê bi rêya korîdora Laçînê ji Qerebaxê biçin.

Di dawiya axaftina xwe de jî Babayan ev gazind ji qada navneteweyî kir: “Çarenûsa gelê me dê wek lekeyeke şermê li eniya cîhana pêşketî di dîrokê de were nivisîn. Rojekê, dê berpirsên çarenûsa me, ji ber şaşî û gunehên xwe hesabê bidin.”