Polîtîkayê lejê taybetî her cayê ciwîyayîsî de xo misnenê. Tecrîd ra pêcerîme heta zorvajîya camêrd-dewlete, onca xan û xirave kerdena xoza, polîtîkayê asîmîlasyonî, feqirîye pêro letê lejê taybetî yê. Nînana pîya binêçim guretene ra heta pêguretene, zîndanan de poynayene ke letê lejê taybetî yo. Bi lejê taybetî wazenê mezgê qomî têwerte bikerê. No dem de zî wazenê gorê xo newe ra homete dîzayn bikerê. Qirkerdena kurdan, Kurdistan de qirkerdene teyna bi tanq û topan nê nîya ke danê ramitene.
Aver şîyayene jû homete bi ciwîyayîsê cenî, genc û domanan a girêdayî ya. Coka dewlete wazena cenîyan mavenê çor desan de kole bikero, gencan ke bi omîd raverdayena hedef cêna. Dewamê kamîya kurdan, ziwan û kulturê kurdan doman ê. Coka polîtîkaya asîmîlasyonî de xorî serê domanan de esta. Perwerde gorê asîmîlê kerdena domanan o. Yew hetî ra domanî ziwanê dayike xo vîrra kenê, hetê ra kî gorê zîhnîyetê dewlete ya kî vajîme yê hokmatê ewroyînî perwerde benê.
Nê serranê peyênan cenî û domanî rastî hêrişanê cînskî yenê. Tecawiz û bi dîmenan ontena cenîyan û gencan tersnenê, bi nê dîmenan a nê hêrişan rê dewam kenê. Yew hetî ra kî bi şantajan nêverdanê vengê xo vejê, yew de nê hêrişan bare bikerê ya kî gare tecawizkaran bikerê. Waxto ke cenî mehkemeyan de zi benê hedefê zîhnîyetê camêrdî, benê hedefê polîtîkayanê lejê taybetî yê dewlete. Kesê ke kincê dewlete kerdê pay, nênê muhakemekerdene. Hetê hokmatî ra yenê seveknayîş. Heftê virênî Mêrdîn de nîya bî. Onca Amed de keso ke ameyêne muhakemekerdene, cezaya ci ameye warodayene. Pêro sazîyê dewlete yê hokmatê AKP-MHPyî wazenê nîya kurdan roz bi roz bixerepnê. Hetê ra bi mehkemeyan, hete ra bi cematan, hetê ra bi esker û polîsan serê kurdan de na polîtîkaya lejê taybetî danê ramitene.
Dûstê polîtîkayanê dewlete de ebi serran o têkoşîno de pîl yeno dayene. Nê têkoşînî de tim cenîyanê kurdan virnîye de cayê xo guretê. Roze ameye zîndanan de, roze ameye meydanan de her waxt vengê xo kerd berz. Vera zîhnîyetê qirkerdoxî bi keda xo, bi qerardarîya xo, bi xoverdayena xo xeylê ci qezenç kerd. Saya cenîyan de nameyê kurdan dîna de jêdena bî vila. Înan xo rêxistin kerd. Vera zîhnîyetê camêrdî têkoşîn da. No mîras dewrê jûbînî kerd. Komel û sazîyan de restê jûbînî.
Pîya vera zilm û zorvajîye vindenê
Serva heqanê xo, seweta qomê xo têkoşîn dayene, xover estene her waxt bîya raya ciwîyayîs, raya weşîye kerdene ya kurdan. Cenîyê ke nê cengî de tewr jêde benê hedefê hukumdaran, her waxt raver sonê, xo aver benê û têkoşînê xo ra game peyser nêerzenê. TJA yo ke no mîras dewr gureto 2016 de ame ronayene. Vera qirkerdene cenîyî xo binê nameyê TJA de rêxistin kenê. Dûstê honde hêrişan de TJA wazeno bi kampanya ‘’Bi Jin Jiyan Azadi’yê ber bi Azadiyê ve’’ (Bi Cenî Ciwîyayîs Azadî ya ver bi Azadîye) vindero. TJA wazeno bi na kampanya cenîyan, gencan pêro pîya qomî pêhesno, vera lejê taybetî hîsgêrîye vejo werte. Vera kamîya cenîyan lej, vera est bîyayena yew qomî lej bi xo ya. Virnîya qirkerdene guretene bi azadîya cenîyan bena. Azadîya cenîyan, azadîya domanan, gencan û pêro hometa.
