Rojanê verênan de Taximê Voleybolî yê Neteweyî yê Tirkîya maço ke bi Sirbistanî reyde kerdbî de ser kewt û kaybazî bi şampîyonîya Ewropa paytextê Belçîka yê Brukselî ra agêrayî Tirkîya. Qezenckerdiş û serkewtişê kaybazan xeylê hetanê cîyayî yê komelî ra ame pîrozkerdiş û bi taybetî serê medyaya komelkî ra mesajê pîrozkerdişî ameyî weşanayîş. Tay partî û parlamenterê partîyê sîyasî zî tewrê pîrozkerdişî bîyî û na rewşe bîye sebebê reaksîyonan.

Partîya Çep a Keske ra parlamenterê Amedî Cengîz Çandar, Sevîlay Çelenk, parlamenterê Kocaelîyî  Omer Faruk Gergerlîoglu û parlamentera CHPyî Turkan Elçîye mesajê xo yê pîrozkerdişî serê medyaya komelkî ra weşanayî. Bi taybetî pîrozkerdişê serkewtişî yê parlamenteranê Partîya Çep a Keske nêrazîbîyayîşî viraştî.

Tay mesajê ke parlamenteran pare kerdbî wina yî: 

Omer Faruk Gergerlîogluyî mesajê xo de vat: “Taximê voleybolî yê cinîyan netîceyanê serkewteyan gêno û rayîrê xo dewam keno. Ma înan pîroz kenî, wa şensê înan hîra bo û ma pawenê ke şampîyonîyan qezenc bikero.”

Parlamentera Amedî ya Partîya Çep a Keske Sevîlay Çelenke zî vat: “Kaybazê ma muhteşemî ra wetêr bîyî. Kelecanêk zêde da ciwîyayîş. Çi çîyo ke weş bibo de cinî esta. Ê siltanê fîleyan î.”

Medyaya komelkî de rexnekerdiş

Mesajê parlamenteranê Partîya Çep a Keske ra dima şar û şixulnayoxanê medyaya komelkî neheqîyê ke Amedspor timî raştê ci yeno vistî vîr û parlamenterî rexne kerdî. Şixulnayoxanê medyaya komelkî sewbîna vist vîr ke înan raye daye nê parlamenteran ke heme neheqîyan rê reaksîyon bimojnî. Pîrozkerdişê şampîyonîye hetê terefgiranê Amedsporî ra zî ame rexnekerdiş û ame vatiş ke nê parlamenterî qey wexto ke neheqî bi înan yeno kerdiş zî vengê xo nêvejnenê. Reaksîyonan ra dima Çelenke parekerdişê xo ercnayîşî rê pada.

‘Hîsanê ma hîs nêkenê’

Tay şixulnayoxanê medyaya komelkî parlamenteran rê vat ke “şêrêne destê nê kaybazan bitepişnê û vajêne ma parlamenterê HDPyî yê Amedî yî. O wext şima do pîrozkerdiş bivînî. Mi raye daye şima. Qey parlamenterê ke ma raye daye ci hîsanê ma hîs nêkenî.”

Hayîya partî şarî ra bibo

Nê reaksîyon û mesajan ra asîyeno ke mîyanê partîye de zî di fikrê cîyayî yenê awankerdiş. HDP û Partîya Çep a Keske ganî firsend nêdî nê munaqaşayan. Nê munaqaşayî zirar danî partîye û ganî partîye ra vengê cîyayî nê, yew vengêk bivejîyo. Hema kongreya partî nêvirazîyaya. Nê çîyî beno ke ameyox de zirarê hîna girdî bidî partî. Ganî hayîya parlamenter û partîye şarî ra bibo, ganî nêro vîrîkerdiş ke no şar raye dayo înan û ê bi xêrê şarê kurdî şîyî meclîs. Sîyaset çîyêk cîya yo û sor sewbîna çî yo.