Akademîsyen Ozgur Muftuogluyî vaybîyayîş û xizanbîyayîş ercna û wina vat: “Tirkîya de hînî her çî vay o. Xizanîye karkeran qerqilnena coka karkerî neçare manenê ke mîyanê şertanê xiraban de bixebitê.”

Muftuogluyî ard ziwan ke mîyanê enflasyonî de hêzê hêrînayîşê merdiman kêmîyayo û vat: “Nê çîyan xizanbîyayîş xo de ard. Tirkîya de hînî her çi vay o. Xizanîye karkeran qerqilnena coka karkerî neçare manenê ke mîyanê şertanê xiraban de bixebitê. Ewro maeşo asgarî bîyo nêmeyê maeşê karkeran. Karkerî binê asta xizanîye de yê. Coka nêrazîbîyayîşê înan xozayî yo. La Tirkîya de nêrazîbîyayîşê karkeran hempar nîyo. Xora sebebê ney ê komelnaskî est ê.”

Muftuogluyî dîyar kerd ke meseleya nikayêne teyna meseleya karkeranê Dîlokî yan zî ê Stenbolî nîya û vat: “Ma mîyanê krîzêkê cidîyî de yê û pêro sektoran binê tesîrê krîzî de yê. No krîz ancax bi çalakîyanê girseyîyan çareser beno. Ganî têkoşînê karkeran o herêmî bivurîyo çalakîyêka pêroyîye. Ganî karkerî û kedkarê umûmîye yew bibê.”