Avûkat Ercan Kanarî vist vîrî ke serranê 90an de DGM de huqûqê dişmenîye ameyêne caardene û vat ke hukmê AKPyî ey ra zaf xirabêr o.
Mehkemeyê Asayîşê Dewlete (DGM) 1973 de ronîyayî, dima ameyî betalkerdene. La wextê Darbeya 12ê Êlula 1982yî de newe ra ronîyayî. DGM tewr peyên 2004 de ameyî betalkerdene.
Kanarî da zanayene ke nê mehkemeyî sey berhemêkê darbe ronîyayê û vat: “Mabênê serranê 1986 û 2002yî de 73 hezar û 936 dewayî ameyî dîyene, mabênê serranê 1990 û 2002yî de 294 hezar û 85 kesan ser o bire dîyaye û 82 hezar kesî ameyî mehkumkerdene. DGMyê Anqara de 4 parlamenterê DEPî amebî muhakemekerdene. Amed de 27 domanî seba ke perwerdeyê bi ziwanê dayîke wazenê DGM de ameyî muhakemekerdene û ceza dîyaye înan. Ez zî 1974 de DGMyê Adana de ameya muhakemekerdene.”
Kanarî ard ziwan ke DGMyan de bi îşkenceyî îtîrafî ameyêne girewtene û nînan de heqê pawitişî kêm bîyê. Ercanî vat: “1980 de wexto ke mi dewayêke de pawitiş kerdêne, mehkeme pawitişê mi ra aciz bîye û seba pawitişî teyna 10 deqayî dayî mi. Mi zî no protesto kerd û salone teriknaye. DGMyan de îtîrafê ke binê îşkenceyî de ameyê girewtene şuxilîyêne. DGMyan de heqê îtîrazê biran û heqê redkerdişê heyetê mehkeme çin bîyî. DGMyî vera xoserîya hêzan bîyî.”
Kanarî dîyar kerd ke DGMyan wextê rejîmê Mussolinî yê faşîstî ra îlham girewtbî û îfade kerd ke wextê AKPyî de mehkemeyî DGMyî ra zaf xirabêr ê. Kanarî vat: “Hukmê wextê AKPyî ê DGMyî ra zaf xirabêr o. Nika seba cezadayîşî delîlê qîmî nêgêrîyenê. Eke şima muxalîf bê no seba cezadayîşî bes o.”
