Endamê Înîsîyatîfê Pawitişê Rayber Abdullah Ocalanî yê Avûkatanê Sûrîye Mustafa Cîbraîlî reftarê CPTyî rexne kerd û wina vat: “CPT bi nêzdîbîyayîşê xo tecrîdê Îmraliyî û sûcanê binpaykerdişanê heqan ê dewleta tirke keno meşrû.”

Cîbraîlî ard ziwan ke tecrîdê Îmraliyî dewamê Komployê Mîyanneteweyî yo û vat: “Rayber Apo nêeşkeno keye û avûkatanê xo bivîno ke no binpaykerdişê heqan o. Dewleta tirke bi cezayanê dîsîplînî kena ke verê pêvînayîşan bigêra. Dewaya Rayber Apoyî dewayêka sîyasî ya. Seba tepişteyanê sîyasîyan ganî cezaya dîsîplînî nêra caardene.”

Cîbraîlî bale ante ser ke CPT bi nêzdîbîyayîşê xo tecrîdî meşrû keno û vat: “CPT hem raporê xo de vano ‘Îmrali de heqê merdiman nênê caardene’ hem zî derheqê rewşa Rayber Apoyî de agahîyêke nêdano. CPTyî hende reyî Îmrali zîyaret kerd la qetî raporê xo eşkera nêkerdî. CPT bi nê nêzdîbîyayîşê xo tecrîdê Îmraliyî û sûcanê binpaykerdişanê heqan ê dewleta tirke keno meşrû.”