Parlamentera Partîya Çep a Keske ya Dêrsimî Ayten Kordu vera asîmîlasyonê dewleta tirke venga şarê Dêrsimî da û wina qisey kerd: “Şarê ma pê zorî dîyeno koçkerdene. La ganî ma wayîrê ziwan, erd, bawerî, kultur û awa xo vejîyê û tîya meteriknê.”

Ayten Kordu bale ante ser ke wextê Festîvala Kultur û Xoza ya Dêrsimî de zî binê nameyê ‘asayîş û aramîye de’ qedexeyî ameyî kerdene û vat: “Ma şaristan de çalakîyêka qije zî bikerê bi seyan polîsî dormeyê ma de yenê pêser. La heman şaristanî de şuxilnayîşê tîryakî vila beno. No şero taybet o. Ciwanî yenê yozkerdene. Eke dewlete wazena şaristan de aramîye û asayîşî bîyaro ca, ganî hêverî Gulîstan Doku bivîno.”

Ayten Kordu vist vîrî ke Dêrsimî zaf reyî surgun, qirkerdiş, teda û hêrişî dîyê û vat: “Kultur, bawerî û ziwanê şarê Dêrsimî tim raştê teda yenê ke nê kerdişî pêro polîtîkayê taybetî yê. Ciwanê ma rîyê nê tedayan ra şinê. Şarê ma pê zorî dîyeno koçkerdene. La ganî ma wayîrê ziwan, erd, bawerî, kultur û awa xo vejîyê û tîya meteriknê.  Sakîna Cansiz û Aysel Dogane tarîxê xoverdayîşî yê Dêrsimî ra yê. Ma zî hêzê xo nê tarîxê xoverdayîşî ra gênê. Ganî ma pîya vera polîtîkayanê şerê taybetî têkoşîn bikerê.”

Parlamentere Ayten Kordu eşkera kerd ke îfadeyê ‘Dêrsim şaristanêko turîstîk o’ parçeyêkê polîtîkayanê asîmîlasyonî yo û vat: “Zîyaretgehê ma binê nameyê turîzmî de yenê çinkerdene. Ma nê nêzdîbîyayîşî qebul nêkenê. Cayê ma yê fîrazî cayê turîstîkî nîyê, ê cayê îbadetî yê. Ma şarê xo, rêxistinanê komelê sivîlî û komeleyanê elewîyan reyde kenê ke verê nê kerdişan bigêrê. Qedexeyî zî leteyê asîmîlasyonî yê. Kultur û bawerîya ma nêşinasîyenê, cografyaya ma rê ‘şaristanê turîzmî’ vajîyeno. La bi nê kerdişan raştîyî nênê nimnayene. Ma do vera nê polîtîkayanê asîmîlasyonî têkoşînê xo rê dewam bikerê.”