Îqtîdarê Erdoganî yo cinsîyetperest her roje vera cinîyan hêrişanê xo zêdîneno. Hukmato kanperest bi polîtîkaya xo ya gemarine zerrî dano camêrdan. Îstîsmar, tecawuz û qetlîyamî êdî bîyî sembolê nê îqtîdarî
Nê demanê peyênan de bi taybetî badê weçînayîşan û ameyîşê îqtîdarê neweyî (AKP-MHP-HUDA-PAR, Partîya Newe ra Refahî) vera cinî û domanan de îstîsmaro cînsî zêdîya û êdî camêrdo îqtîdar bi hawayêko eşkera çîyo ke wazeno ca ano. Polîtîkaya bêcezaverdayîşî ya îqtîdarî cesaret dana camêrdan û camêrdî vera cinî û domanan bi asanî êdî eşkenê caardişanê xo yê xiraban û lêşinan pê bîyarî.
Goreyê dayeyanê fermîyan donemê AKPyî de Tirkîya û Kurdistan de tecawuzê hemverê cinî û tutan zêde bîyo û Kurdistan de çarçeweya şerê taybetî de her tewir xirabîyî yenê rayraberdiş. Tewr peynî 27ê gulana 2016î de dewêka qezaya Şemzînanî ya Colemêrgî de 3 kesanê bi nameyê Veysî, Zahîr û Nîhat Yilmazî tecawuzê Esra Y. ya 11 serrî kerdbî. Nê 3 kesan sere de 42 serrî cezaya zîndanî girewte la dima ra qerar ame xeripnayîş û serbest ameyî verdayîş. Serbestverdayîşê nê kesan bî sebebê xokiştişê Esra.
Tebîî tîya de ercayeyê vîrvistişî yo ke Serekê Weqfê Hîranurî yê Cematê Îsmaîl Axayî Yusuf Zîya Gumuşelî zî kênaya xo ya 6 serre murîdêkê xo reyde dabî zewijnayene. Dima ke kênaya ey xo hesîya û qala qewimîyayîşo ke sereyê aye ra derbaz bibî kerd, raştîya rîyê cematan reyna vejîye werte. Îdareyê Erdoganî seba domnayîşê îqtîdarê xo hêz dano nê cematan û ê zî cîrît erzenê.
Domanê Alî Erbaşî
Kênaya Alî Erbaşî çend roje verê cû serê medyaya komelkî de fotografêk pare kerdbî. Fotograf teyaregehêk de ameybî antiş û vayeya kurê ekonomîye ra sey yarîye gere kerdêne. Domananê xo ser de nuştbî ke êdî nêeşkenê şêrî teberê welatî. Fotograf de kênaya Alî Erbaşî Feyza Erbaşe vana ke kênaya aye ya pîle heta nika 13 welatan de gêraya. Lajê aye seba ke raştê pandemîyî ameyo, 2 welatî gêrayî û domano peynî zî mexdurê ekonomî yo.
Îstîsmar, krîz û qetlîyam
Tirkîya de goreyê dayeyanê fermîyan îstîsmar, krîzê ekonomî, qetlîyamê cinîyan, zêdîyayîşê tîryakî û polîtîkaya bêcezaverdayîşî vêşêr bîyo. Welatêkê winasî de şar kewto etîrê îdareyî, la tay kes û kesê ke nizdîyê îqtîdarî zî kewtî etîrê gêrayîşê welatan. Xema înan rewşe û ameyoxê welatê înan nîya. Ê têna ewnîyenê rewşa xo ra. Domanê şarî merdî, raştê tecawuz û îstîsmarî ameyî, labelê xema înan de nîya. Domanê kurdî nêeşkenê nan biwerî la domanê înan welat bi welat gêrenî. Nêgêrayîşê welatan zî xo de sey kêmanîyêke, krîzêk vînenê û vanê ekonomî zêde ma ser de tesîr viraşta.
Îqtîdar talîbanî teqîp keno
Ma mîyanê rewşêka winasî de Tirkîya de ciwîyenê. Tirkîya bîya gola xirab û xirabîîyan. No welat êdî bi krîzan û xirabîyan hetê dînperestê menfîetkaran ra yeno rayraberdiş. Bi ameyîşê îqtîdarê newî ke hepskerdişê cinîyan xo rê kerdo hedef, hêrişê vera cinî û domanan zêdîya. Tabîî do her tewir xirabî zêde bibo û hîna beno ke nê rojê ma yê başî bîyî zî. Qala nêweşxaneyê cîya, otobusa cîya û perwerdeyê cîya yena kerdiş. Her raşteyê cuye de cîyakerdişê cinî û camêrdan, heta cîyakerdişê domanan yeno munaqaşakerdiş. Nika eno îqtîdar zemînê rayraberdişêkê talîbanî virazeno û wazeno ke haremî virazo.
