Kalyon Holdîngî qezaya Wêranşarî ya Riha de serê erazîya mera ya bi 13 hezarî donime de dest pê projeyê GESî kerd.

Qezaya Wêranşarî ya Riha de mezraya Dûzikî de bi destê Kalyon Holdîngî Projeyê Santralê Enerjîya Rojî (GES) dest pêkerd. Çarçewa projeyî de meraya ke şar serê ci de heywankarîye keno de 162 hezarî 500 panel do bêrê viraştene.

Şarê mezraya Dûzikî vera nê projeyî vejîyeno. Roniştoxanê mezra ra Zîne Taşkine wina qisey kerd: “Ê ma rê zulm kenê. Eke tîya de panel bêro viraştene, ma do heywananê xo ça de biçerênê? Nê merayî seba yew dewe nê, seba çend dewe û merdimî çimeyê debare yê. Ma do heta peynî vera bivejîyê. Ma yew merdim zî bimanê, do destûr medê kerdişê GESî.”