Tepişteyo nêweş Mehmet Emîn Ozkanî bale ante xoverdayîşî û wina vat: “Ma heta ewro xover da, sozê xo tepişt. Ma zaf bedelî dayî, ma do heta peynî xover bidê.”

Tepişteyo nêweşo giran Mehmet Emîn Ozkan (84) badê raporê “zîndan de nêeşkeno bimano” yê Dezgehê Tibê Edlîyî vizêr Amed de ame tehlîyekerdene. Seba ke nêweşîya Ozkanî zaf girane bîya, cezaya ci seba hîrê aşman ameyî peydeeştene.

Mehmet Emîn Ozkano ke badê 27 serran reya verêne ame keyeyê xo Ajansê Mezopotamya rê qisey kerd. Ozkano ke goşanê ci de giranî est a nê vatî: “Ma heta ewro xover da, sozê xo tepişt. Ma zaf bedelî dayî, ma do heta peynî xover bidê. Zîndan zaf giran o. Embazê ma uca de têkoşînê pîlî rayra benê. Ez çend qala nê xoverdayîşî bikerê zî kêm maneno. Dewleta tirke se kerd nêkerd nêeşka xoverdayîşî bişikino.”