Neteweyanê Yewbîyayeyan ra Raportara Taybete Reem Alselame bale ante şîdetê dewleta tirke yê vera cinîyanê kurdan û wina vat: “Mekanîzmayanê bêhet û zelalan ronê ke wa şîdetê vera cinîyan ê kurdan bêrê cigêrayene û hêrişkarî bêrê cezakerdene.”

Raportora Taybete Reem Alselame raporê xo yê 19 pelan de cayo taybet da şîdetê serê cinîyan ê kurdan û bale ante hêrişanê leşker û polîsanê tirkan ê vera cinîyan ê kurdan û PKKyijan ser.

Rapor de wina ame vatene: “Cinîyê kurdan bitaybetî binê rîskî de yê. Cinîyê kurdan rîyê nasname û ziwanê xo ra raştê şîdetî yenê. Heqê înan yenê bipaykerdene. Reyna şerê vera PKKyî de zafê ci cinîyî kurdê sîvîlî yenê qetilkerdene û raştê şîdetê cînsî yenê. Reyna cinî û kênayê kurdan tim raştê tacîz û tehdîtan yenê. Zafê înan bi hewayêkê keyfî yenê destbendkerdene û muhakemekerdişanê nehaqan de rî bi rî manenê. Coka ma semedê cinîyan ê kurdan qerqilîyenê.”

Raportora Taybete Reem Alselame veng da ke wa hêrişê artêşa tirke yê vera cinîyan ê kurdan bêrê cipersayene û nê vatî: “Şîdetê cînsî yê vera cinîyanê kurdan cibigêrê, ceza bidê berpirsîyaran. Mekanîzmayanê bêhet û zelalan ronê ke wa şîdetê vera cinîyan ê kurdan bêrê cigêrayene û hêrişkarî bêrê cezakerdene.”