Kolonyalîstî amê û Kurdistan lete kerd, dime ra kî ciya ciya polîtîkaya qirkere rayra berde. Înan heta roza ewroyîne seweta ke şaro kurd xo nas nêkero, kamîya xo rê wayîr nêvejîyo her çî kerd. Manaya çekuya qirkerdene zaf hîra ya. Qirkerdena înson, û tehcîrî, ca wo ke qom tey ca bîyo ucayan axmekerdene û qirkerdena kulturî ya. Kurdî se serrî yo rastê na polîtîka yenê. Teyna canê mordemî nê, xoza ra heta kulturî çik ke kamîya kurdan ano werte kerdê çimanê xo.

Ebi serran kom bi kom ya kî yew bi yew kurdî kistî. Hama her waxt kurdî ameyî xo ser, na reye kî mezgê kurdan hedef guret. Waxto ke mezg vurîya, o waxt mordem jê wuşire hen bêvate destê miletî de fetelîno. Beno kayê sarî, beno kayê dismenanê xo.

Qirkerdena kultur, zagon û zîxnîyetî merdena însonî ya. Eke nameyê welatê to, nameyê hardê to, nameyê to û ziwanê to nênê naskerdene û ziwanê to qedexe beno, o waxt to ser o polîtîkaya qirkerdene xorî ra yena ramitene.

Nî serranê peyênan ‘planê çokan ser ardene’ bi hedefguretena gencan û cenîyan tenina ame vurnayene. Lejo taybet na reye kî ser kulturî ra yeno ramitene. Kulturê kurdan, kamîye û zonê ci yenê asîmîlekerdene. Bi na polîtîka domanan û gencan zonê xo ra durî kenê, jû vatisê bînî gama virêne ya tirkbîyayene erzenê.

Kurdan ser o tim polîtîkayê asîmîlasyonî ameyî ramitene. Hama qirkerdena kulturî xorî ra mezgê gencan û domanan hedef cêna. Nî serranê peyênan her cayê Vakûrê Kurdistanî de binê nameyê festîval û konseran de na polîtîka yena ramitene. Agirî ra heta Cîzir, Amed, koyanê Cîlo, Tetwanî tayê konserî ameyî virastene. Bi nî konseran, bi raya nî kesan kurdan kamîya ci ra, kulturê ci ra serdin kenê. Waxto ke hunermendê kurdan biwazê konseran bidê, kenê qedexe û nêvardanê qom ret bêro gos bido nî konseran ser.

Serva qirkerdena kulturî yeno vatene ke asîmîlasyonode xorî û hîra bi xo ya. Bi na raye, kolonyalîstî armanc kenê ke kurdî kamîya xo, tarîxê xo, ziwan û kulturê xo xo vîr ra bikerê û xo jê tirk bivînê.

Zîxnîyeto qirkerdox bi raya konser û festîvalan kî kewto Kurdistan. Teyna Vakur de nê, Başûr de kî heta Duhok, Zaxo binê nameyê muzîkî de polîtîkayê tirkkerdene yenê ramitene.

Kultur û zagonê kurdan ci rê kenê qedexe. Bi nî konser û festîvalan kî hata verê çêberê kurdan yenê û eskera vanê “kamîya xo caverdê, kurdîya xo caverdê û bibê koleyê binê destê ma.

Kurdî heta roza ewroyîne bi bedelanê giranan kamîye û kulturê xo rê wayîr vejîyayî. Naye ra tepîya kî karode giran hermanê ma pêronan ser der o. Kulturê ma, ziwanê ma û kamîya ma wo.

Verra lejê taybetî, verra îyê ke gencanê ma oncenê zerreqilerîye, jû vatisê sima bibo. Virnîya na qirkerdene de vinderî.