Hemserekanê KON-MEDî ard ziwan ke Îmrali de rewşe xeylê xirab a û wina veng da: “Dewleta tirke mektubanê tehdîtî yê bêname û bêadresî dana Abdullah Ocalanî. Gerek cade lezabez na rewşe bêro zelalkerdene.”

Eşkerayîya KON-MEDî de ame vîrvistene ke bi serran o Abdullah Ocalanî ra qet xebere nîna girewtene û nê ameyî parekerdene: “Şarê kurdî derheqê rewşa rayberê xo Abdullah Ocalanî de qet çîyêk nêzano. Rixmê heme cehdkerdişan tecrîd yeno domnayene û qesawetê ma zêdîyenê. Dewleta tirke mektubanê tehdîtî yê bêname û bêadresî dana Abdullah Ocalanî. Îmrali de rewşe zaf vahîm a. Coka gerek cade lezabez na rewşe bêro zelalkerdene. Gerek cade helêke cuwa ver Abdullah Ocalanî ra xebere bêro girewtene.

Abdullah Ocalan Rayberê Şarê Kurdî yo. Emrê xo semedê azadîya şarê kurdî dayo, wayîrê felsefeya azadîye û roşnîye ya dewrê ma yo. Fîkrê ey hetê bi mîlyonan ra yenê wayîrvejîyayene û semedê şaranê dinya bîyî çimeyê hevî. Rayber Apoyo ke bi paradîgmaya xo şer û qirkerdişanê Rojhelatê Mîyanênî rê beno çare, gerek dahîna zaf bêro wayîrvejîyayene.

Rayber Apo seba ke sere de meseleya kurdan, meseleyanê bînan de zî rolê ci gird o, binê tecrîdê giranî de yeno tepiştene û tecrîd hema hema heta pêro Tirkîya, Kurdistan û Rojhelatê Mîyanênî vila bîyo. Coka gerek ma dahîna zaf wayîrê Rayber Apoyî bivejîyê. Eke ma ewro nêeşkenê qet xeberêke ey ra bîgêrê, yeno no mana ke ma kêm wayîrê ci vejîyayî. Nê semedî ra gerek heme şarê ma cade lezabez bi hawayêkê bêmabênî bi çalakî û aktîvîteyan destkarîya prosesî bikero.

Ma xo vîr ra mekerê ke tecrîd û sîstemê îşkenceyî yê vera Rayber Apoyî hêrişê qirkerdişî yê vera kurdan o. Aye ra ma sey KON-MEDî veng danê ke wa şarê ma ewro ra tepîya bi çalakî û aktîvîteyan têkoşînê xo xurtêr bikero!”