Konferansê serrgêra 100. ya Peymana Lozanî do 22-23yê temmuze de bibo. Hemserekê KNKyî Ehmed Karamusî wina vat: “Ma sey kurdan hînî çar parçeyanê Kurdistanî de statuyêkê fermîyî wazenê.”
Karamusî vist vîrî ke ê do 22-23yê temmuze de Peymana Lozanî ser o konferansêk do bidê û vat: “Ma ‘Konferansê Kurdistanî’ 22-23yê temmuze de bikerê. Xeylêk partîyê sîyasî, dezgehî, rêxistinî do tewrê konferansî bibê. Seba ke her parçeyê Kurdistanî ra beşdarîye biba ma xebatêka pîle kerde. Konferans serkêşîya KNKyî de do bêro kerdene. Amadekarîyê ma yê teknîkî qedîyayî. Seba bernameyanê Peymana Lozanî pê beşdarîya 157 partî û rêxistinan ‘Komîteya Çalakîyanê Serra 100. ya Lozanî’ ronîyaye.
Ma wazenê ‘Konferansê Kurdistanî’ bibo konferanso neteweyî. Coka ma hema hema pêro sereşîran, rîsipîyan, kesayetan, rêxistinan, dezgehan û partîyan de pêvînayîşî kerdî. Ma kerd ke pêro rengê Kurdistanî nê konferansî de biasê. 500 dezgeh û kesan zî da zanayene ke ê do tewrê konferansî bibê. Heyf ke tayê partîyî nêwazenê tewrê konferansî bibê. Ma hînî wazenê ke yewîya xo awan bikerê û seba ney xebitîyenê.”
Karamusî qiseykerdişê xo wina domna: “Bi Peymana Lozane Kurdistan ame parçekerdene û kurdî ameyî qirkerdene. Garantorê Peymana Lozanî mesuldarê nê qirkerdişan ê. Ma wazenê Konferansê Kurdistanî yê Lozanî de qala serebûtanê ke ameyê şarê kurdî bikerê û waştişanê neteweyîyan bîyarê ziwan. Kurdan qetî Peymana Lozanî qebul nêkerde û vera ci dewaya azadîye kerde. Konferans de kurdî do vera qirkerdişanê 10 serran tewirê xo bimojnê. Ma sey kurdan hînî bi estbîyayîş, nasname û ziwanê xo wazenê çar parçeyanê Kurdistanî de bibê wayîrê statuyêkê fermîyî. Sîyasetê Rojhelatê Mîyanênî de seba kurdan firsendêko girîng vejîyayo werte û hetê şaranê dinya ra yeno qebulkerdene. Ganî ma nê firsendê tarîxîyî destî ra nêdê. Caardişê yewîya neteweyî ya kurdan esas o. Ma eşkenê hem verê Neteweyanê Yewbîyayeyan de hem zî verê Yewîya Ewropa hem zî Yewîya Ereban de rayîr û metodanê xo yê sîyasîyan aver berê. No konferans seba averberdişê yewîye girîng o.”
