Ekonomîya Tirkîya sey marî xijok a. Faîzê polîtîka se ra 15 bî û cade dovîz pêl bî. Komel êdî destê na bêîstîqrarîye de bêzar bîyo.
Hukmatê Erdoganî nêeşkeno ekonomî îdare bikero. Çike her cayê Tirkîya de bêrayîrîye esta. Bankaya Merkezî de rezervî qedîyayî. Butçe de aheng çîn o. Deynê teberî kêmî-zêde 500 mîlyar dolar bîyo. Êdî Bankaya Merkezî nêeşkena pîyaseyî stabîlîze bikero. Eke rezervî çîn ê, zêdînayîş yan kêmîkerdişê faîzî feydedar nêbeno.
‘Edalet bingeyê milkî yo’
Her çî ra ver Tirkîya de huqûq çîn o. Xora tirkî bi xo wina nusenê “edalet bingeyê milkî yo.” Erdogan û hempayê ci her roje qanûnan binpay kenê. Welatêkê winayênî de ekonomî de îstîqrar nêbeno, o welat sermayegozaran rê zî bawerîye nêdano. Erdoganî verê cû vatbî: “Eke dolarê înan esto, Homayê ma zî esto.” Hişmendîya ke Tirkîya îdare kena hende kanperest û bom a.
‘Heq faîzî heram hesibneno’
Na xêxîye zaf reyî vejîyaye verê komelî. Erdoganî vatêne o ekonomîst o û her çî zano. Coka “ferman” da û Serekê Bankaya Merkezî faîz heta se ra 8.5î da waro. Yew zî ey vatêne ke o musluman o û seba ey “nasî” muhîm ê. Raştî zî Quran de Sureyê Bakara Ayetê 275. de nusîyeno ke “Heq dayîş-girewtişî xelal vîneno, la faîzî heram hesibneno.”
Erdoganî sozê xo nêtepiştî
Erdoganî weçînayîşî verî hetta raşteyanê weçînayîşî de terefgiranê xo rê soz dayêne ke o do goreyê nasan têbigêro. Netîce de Erdoganî sozê xo nêtepiştî. Kabîneya newî de Mehmet Şîmşek sey Wezîrê Xezîna û Malîye ame tayînkerdene. Nasê Erdoganî perrayî û faîz se ra 15 bî. Tayînkerdişê Şîmşekî de zî “xijokîya” Erdoganî esta. Çike Erdoganî verê cû vat ke Şîmşek wazeno Halkbank de dizdîye bikero. Nika o merdimo “dizd” kerd wezîr.
