Goreyê dayeyanê TÎHV, ÎHD û TTByî da serra 2022î de zîndanan de 83 mergê şikdarî qewimîyayî. Yew zî nezaretan de 4 hezar û 275 kesî raştê îşkence û muameleya xirabe ameyî.
Eşkerayîye de dîya zanayene ke îqtîdarî pêro welat vurnayo warê îşkenceyî û seba ke verê îşkenceyî bêro girewtene, ganî polîtîkaya cezanêkerdişê faîlan ra bêra teriknayene. Eşkerayîye de wina ame vatene: “Ganî îşkence pê vateyan nêro hankerdene, selahîyetdarî wasfê îşkence û îşkencekeran nêdê û vera îşkenceyî vejîyê.
Eşkerayîye de doneyê serê îşkenceyî wina ameyî rêzkerdene:
”-2022 de kesêk, panc menganê verênan ê 2023yî de zî tewr tay 6 kesan îşkenceyî ra dinyaya xo bedilnaye.
-Panc menganê verênan ê 2023yî de 270 kesî raştê îşkence û muameleya xirabe ameyê, coka înan muracatê TÎHVî kerd.
-Goreyê TÎHVî 2022 de hûmara serebûtê îşkenceyanê zîndanan 1201 a.
-Goreyê ÎHDyî 2022 de nezaretan de tewr tay hezar û 347 kesî raştê îşkence û muameleya xirabe ameyî.
-2022 de çalakî û nawnayîşan de 144ê ci domanî tewr tay 5 hezar û 434 kesî û panc menganê verênan ê 2023yî de zî 49ê ci domanî tewr tay hezar û 557 kesî raştê îşkence û muameleya xirabe ameyî. Netîceya nê destkarîyan de tewr tay 50 kesî birîndar bîyî.
-2022 de tewr tay 230 kesî, panc menganê verênan ê 2023yî de tewr tay 76 kesî raştê îşkence û muameleya xirabe ameyî. 33 kesî zî wextê sereştişan de raştê îşkence û muameleya xirabe ameyî.
-Goreyê ÎHDyî 2022 de 198 kesî raştê ferzkerdişê ajanîye, remnayîş û gefan ameyî.
-Goreyê TÎHVî 2022 de zîndanan de 65 tepişteyî, panc menganê verênan ê 2023yî de zî 10 tepişteyî merdî. Goreyê ÎHDyî 83 tepişteyî 2022 de zîndanan de bi hawayêkê şikdarî merdî.”
