Cinîyî sey malzeme yenê dîyene. Hetê camêrdan ra qîmet nêdîyeno înan û welatêkê winasî ke bi nimitkî pê şerîatî yeno rayraberdene de cuye cinîyan rê yena tengkerdene. Têna cinî nê domanî zî seba ke hêzê ci kêm yeno dîyene, yenê hedefgirewtene û her tewir xirabî bi înan yena kerdene. Çi balkêşo ke pêro xirabîyê ke bi cinî û domanan yenê kerdene, binê nameyê olî de yanî cayanê sey kursê olî, camî ûsn. de yenê kerdene. Yanî bi şuxulnayîşê bawerî olperestê dişmenî yê cinî û domanan her tewir xirabîyan kenê û zewqê xo ra kêmî nêbenê. Pêro xirabîyan û heta zîna zî pişnenê ol û xo bi tobeyêkî vernîya Homayî de pak vejenê.
Nika ma weçînayîşan xo pey de verda. Huda Par û Yenîden Refah ke dişmenê cinîyan ê dekewtî meclîs. Propagandaya weçînayîşî de namzedê cinî kişta fotografê camêrdî de sey veristî ameyî mojnayîş û wexto ke dekewtî meclîs zî pêşnîyaze kerde de korîdorê cinî û camêrdan yewbînan ra cîya bibo. Kenê ke qanûnê 6284î zî sey Peymana Stenbolî tepîya bêro peyserantene, pêro heqê cinîyan dest ra bêro girewtene, cuye cinî û domanan rê bêra tengkerdene.
Welat dîyeno destê olperestan
Ma dekewtî donemêkê newî. Bi mendişê îqtîdarî demêko dergo ke beno sebebê koçkerdişan û bi ameyîşê îqtîdarî reyde welat de kesê bi aqil û îtîbar hema hema nêmanenî. Welat dîyeno destê zaliman, zordestan û olperestan. Pêkerdişê Huda Par û Yenîden Refahî xora tabloya ke ma pawena mojneno. Welato ke tede îstîsmar, tecawuz û qetilkerdişê cinîyan zêde yo de do na tablo hîna biba hîra û cuye doman û cinîyan rê bêra çinîkerdene. Şîdet, tecawuz, tacîz, qetlîyam, feqîrî, zordestî, neheqî, binpaykerdişê heqan û heme xirabîyî do donemê vernîya ma de hîna zêde bibî. Beno ke îqtîdar rayraberdişêkê winasî û rewşa kaosî nêwedarno û şêro weçînayîşê newî. Tebîî no îhtîmal nika ra xo mojneno. Îhtîmalê çîyêkê winasî esto.
Seba olî qetlîyamî virazîyenê
Şeklê rayraberdişî yê Afganistan, Îran û welatê ke pê şerîatî yenê rayraberdene Tirkîya de zî esto. Fermîyet de laîkî bibo zî eslê xo de şerîat yeno rayraberdene. Laîkî ameya bê bandorkerdene. Olperestê destgonînî bi nameyê Homayî qetlîyaman virazenê, tecawuzê domanan kenê, hewl danê ke cuye cinî û domanan rê teng bikerê. Olê înan de vatiş û kerdiş yewbînan nêtepişeno. Çîyo ke xo rê xelal kenê, sewbînan kesan rê heram kenê û heta kişenê. Hele ma biewnî no îqtîdar bi şeklê şerîatî heta key bîyayîşê xo do dewam bikero. Seserra 21. de qet pergala bi 1400 serran yena awankerdene? La no zîhnîyet seba bîyayîşê xo her çî keno. Eke şerîat menfaetê nê îqtîdarî rê hewce keno, o wext ey zî “şuxilneno”.
