Hemserekîya Konseya Rayberdişî ya KCKyî eşkera kerd ke prosesê bêçalakîyîye yo ke badê erdlerzî dabî destpêkerdene qedîya.

Eşkerayîyêka winayêne ameye kerdene:

“Seke yeno zanayene 6ê sibata 2023yî de Elbîstan û Bazarcix de di erdlerzî qewimîyayî. Ma sey têgêrayîşî berpirsîyarîya xo ya însanî û ehleqî arde ca û qerar girewt ke heta ke na rewşa girane biqedîyo çalakîyan mevirazê. Hêzanê ma yê pawitişê şarî zî badê vengdayîşê ma eşkera kerd ke ê do çalakîyan mevirazê û têna vera hêrişan xo bipawê. HPG û heme yewîyê leşkerî yê pabesteyê ci goreyê nê qerarî têgêrayî.

Hema ke tesîrê erdlerzî nêqedîyabî Tirkîya kewt prosesê weçînitişî. No weçînitiş semedê kurdan û tirkan pîya zaf muhîm bî. Seba ke ma verê provokasyonanê îqtîdarê faşîstî yê AKP-MHPyî bigêrê, ma prosesê bêçalakîyîye heta qedîyayîşê weçînitişî kerd derg. Bêşik ma sey têgêrayîşî wazenê meselaya kurdan bêro çareserkerdene û Tirkîya bibo demokratîk. Coka ma bi nê tewirê xo paştî daye sîyaset û prosesê sîyasîyî.

Bêşik şarê ma û hetê welatperwer û dostê demokratî û rêxistinê kurdan û xeylêk hêzê mîyanneteweyî zî pê nê qerarê ma kêfweş bîyî la îqtîdarê AKP-MHPyî hêrişê xo yê îşxal, qirkerdiş û tasfîyeyî zêdînayî û no qerarê ma veng vet. Îqtîdarê faşîstî nê prosesî de hêrişê xo nêvindarnayî û şuxulnayîşê çekanê qedexeyan rê dewam kerd. Reyna Başûr, Şingal, Mexmûr û Rojawan de zî hêrişê qirkerdişî zêdînayî. Tirkîya û Vakûrê Kurdistanî de vera şar û sîyasetê demokratîkî hêrişî zêdînayî. Tecrîdê serê Rayber Apoyî ame giranêrkerdene. Bi kilmî îqtîdarê faşîstî vera şar û têgêrayîşê ma hêrişê xo zêdînayî. Vera nê hêrişan qerarê ma bîyo bêmana.

Muxalefetê Tirkîya zî paştî nêda nê qerarê ma. Çar aşman ra zafêr o ke hêzê ma goreyê nê qerarî têgêrenê. Senî ke Silêmanî de bi qetilkerdişê hemra şorişgêr Baran Avrêl (Huseyin Arasan) zî ame vînayene vera şar û têgêrayîşê ma yewna pelê hêrişî dîyayo destpêkerdene. Vera nê, têkoşîno aktîfo ke derbe dano dişmenî ro şert o. Rîyê nê heme sebeban ra ma ewro ra tepîya qerarê xo yê bêçalakîyîye qedînenê. Ma veng danê şarê xo û hêzanê demokratîkan ke wa vera îqtîdarê AKP-MHPyî têkoşînî gird bikerê.”