Wendekara Unîversîteya Munzurî Gulîstan Dokuye Dêrsim de 5ê çeleyê 2020î ra nata vînîbîyaye ya. Vindîbîyayîşê Dokuye ra dima vejîya raşte ke Dokuye tewr peynî embazê xo Zaynal Abarokî reyde telefon de qisey kerda. Zaynal Abarok eslê xo ra kesêko rûs o, pîyê ci Engin Yucerî polîs o. Heta nika derheqê keso şikin Zaynal Abarakovî de tu tehqîqatêk nêdîyayo dest pêkerdene û hedîse sey ‘xokiştişî’ yeno mojnayene. Keyeyê Gulistan Dokuye ke aye ra hema zî şopêk nêameyo dîyayene seba musayîşê aqûbetê kênaya xo bi mektubêke veng daye Kemal Kiliçdarogluyî.

Mektube de wina ame vatene: “Eke şima bi tercîhê nê şarî edalet bigêrî, bibê serekkomar û nê prosesî newe ra bigêrê dest û ma rê eşkera bikerê ke kênaya ma se bîya. Bikerê ke kesê berpirsîyarê hedîseyî bivejî vernîya edaletî û cezaya ke heqê înan a bidîya înan. Sey keyeyê Şenyaşarî Kiliçdaroglu wa keyeyê Dokuye rê zî bibo veng. Ma keyeyêk halê xo de yî. Ma zî dewleta Komara Tirkîya de ciwîyenê. Ma hem hesreta kênaya xo hem zî hesreta edaletî ciwîyenê. Ma vînenê ke şima hewl danî her ca de bibî vengê merdimê ke bêedaletîye reyde rî bi rî mendî. Gulîstane 3 serr û nîme yo ke cayêk sey Dêrsimî ke binê abluqaya kamerayan de yo, vînîbîyaye ya. Ganî keso şikin Zaynal Abarakov bêro cipersayîş û muhakemekerdiş.”