Nameyanê sembolîkanê têkoşînê azadîye ra şorişgêr Hakî Karer 18ê gulana 1977î de Dîlok de bi destê ajanêkê bi nameyê Alaattîn Kapanî ame qetilkerdene. Oncîna serkêşê TKP/MLyî Îbrahîm Kaypakkaya 18ê gulana 1973î de zîndanê Amedî de bi destê dewleta tirke ame qetilkerdene. Nameyê înan tarîxê merdimîye de wayîrê cayêkê girîngî yo.
Hakî Karer qezaya Ulubeyî ya Ordu de serra 1950î de maya xo ra bî. Seba perwerdegirewtişî şî Anqara û Unîversîteya Anqarayî de dest pê wendişê beşê fîzîkî kerd. O dem dest pê xebatanê şorişî zî kerd. Pê Rayberê Şarê Kurdî Abdullah Ocalan û Kemal Pîrî bingeyê têgêrayîşê kurdan eştî. Bêguman mabênê ey bi Ocalanî de embazîyêka girde estbî. Tewr zîyade Ocalan vano ke Hakî Karer ruhê ey ê nimitkî yo.
Merdimo fedakar û jîyat
Yeno zanayene ke Hakî Karer mîyanê ronayoxanê PKKyî de bî. Verê ke PKK nêamebî ronayene, Komeleya Demokratîke ya Perwerdeyê Berzî ya Anqara da tewrê xebatanê sîyasîyan bî. Badê cû ame Kurdistan û dest pê xebatanê rêxistinkerdişî kerd. Bitaybetî Dîlok de nameyê Karerî vila bîbî. Embazê ci Muslum Erîklîyî par Ajansê Mezopotamya rê derheqê kesayetê Hakî Karerî de tayê çimdarîyê xo pare kerdî. Erîklî wina qisey keno: “Hakî zaf merdimo vindete bî. Xeylê giran bî. Zaf qisey nêkerdêne. Embazo fedakar û jîyat bî.”
Bi destê ajanî ame qetilkerdene
Hakî Karer 18ê gulana 1977î de Dîlok de ame silahîkerdene qewexaneyêkî. Uca de bi destê Alaattîn Kapanî ame kiştene. Muslum Erîklî yo ke ê rojan rê şahidîye kerda, vano ke Alaattîn Kapan ajan û provakator bî. Hetta Erîklîyî embazê ci Karerî rê pêşnîyaze kerdo ke nêşêro qewexane. Erîklî ey wina ano yadkerdene: “Hakî merdimo zaf taybet bî. Her kesî ey ra hez kerdêne. Xovîrrakerdişê Hakî qet mumkun o?… Ey xo ra verî embazê xo fikrîyêne.”
Sere da, la sir nêda
Serkêşanê têgêrayîşê şorişî û ajê 68î ra merdimêko bînî yo şorişgêr Îbrahîm Kaypakkaya bî. Nameyê ci sey “merdimo ke sereyê xo da, la sirê xo nêda” namdar o. Kaypakkaya serra 1949î de dewa Karakaya ya qezaya Sungurlu ya Çorumî de ame dinya. Key ke Wendegehê Mamosteyîye yê Berzî yê Çapa de wendêne, bi hawayêkê aktîfî polîtîka de eleqedar bî. Nê serran heman wextî de Unîversîteya Stenbolî de beşê fîzîkî wendêne. Kaypakkayayî no dem Kulubê Fikrî yê Çapa zî rona.
Ronîyayîşê TKP/MLyî
No wext dînamîkê çepgirî binê serbanê TÎPî (Partîya Karkeranê Tirkîya) de rêxistin bîyêne. La mîyanê partîye de yabiryayîşê îdeolojîkî yê xorînî qewimîyayî. Kaypakkaya zî tesîrdar bî û Tezê Şorişê Demokratîkî yê Neteweyî pawit. Badê cû partîya TÎÎKPyî de (Partîya Karker û Dewijan a Şorişgêre ya Tirkîya) têkoşînê xo dewam kerd. Labelê na partîye de reformîzm û revîzyonîzm estbî. Kaypakkayayî zana ke na partîye şorişî armanc nêkena û têna seba reformê îqtîdarî polîtîka kena. Coka ey û rayirhevalanê ci serra 1972î de partîyêka şorişgêre (TKP/ML) ronaye. Partîye çarçeweya lenînîzm û marksîzmî de şorişêko çekdar pêqayil bîye. Bi nê hawayî tayê şaristananê Kurdistanî de têkoşînêko qerardar ame rayraberdene.
Zîndanê Amedî de îşkence
Kaypakkaya û rayirhevalanê ci bitaybetî Dêrsim de vera dewleta tirke têkoşînêko bêhempa kerd. 24ê çeleyê 1973î de dewa Vartînîkî de dormeyê înan hetê artêşa tirke ra gêrîya. Pêkewtiş de Kaypakkaya dirbetin bî. Nêzdî 5 rojî koyan de dirbetin mend. Dima ra mamosteyêkê bi nameyê Cafer Atanî derheqê cayê ey de leşkerî hişyar kerdî. Peynî de Kaypakkaya ame tepiştene û berdene zîndanê Amedî. Tîya de teqrîben 4 aşmî îşkence dî û 18ê gulana 1973î de ame qetilkerdene. Dewleta faşîste îlan kerd ke ey “xo kişto.” Nameyê Karer û Kaypakkayayî do heta hela peyêne biciwîyê.
