Dêrsim de vizêr buroyê Partîya Çep a Keske ame akerdene û slogana “Jin, jiyan, azadî” bîye berze. Cinîyê Dêrsimî pê bawer ê AKP do şêro.
Namzeda Partîya Çep a Keske ya Dêrsimî Ayten Kordu zî vat: “Ma bi hêzê
‘Jin, jiyan, azadî’ kewtî warî. Na hinda yew slogane nîya. ‘Jin, jiyan, azadî’ yew tewirê cuye yo ke bi keda têkoşînî û xoverdayîşê cinîyan gave bi gave ame nûştene û heta ewro ame. Coka ma sey cinîyan do parlamento de temsîlîyetê tewr girdî bikerê. Ma do pêro pîya ser bikewê.”
Hetê bînî ra cinîyê ke tewrê akerdişê buroyî bîyî ard ziwan ke Partîya Çep a Keske semedê înan bîya hêvî û vat ê do sey cinîyan nê sîstemî bibedilnê.
Cinîyan ra Pakîze Aydine vist vîrî ke cinîyî bi serran o vera îqtîdarê AKPyî xover danê û vat: “Semedê rijnayîşê rejîmê yewmerdimî ma do rayanê xo bidê Partîya Çep a Keske.”
Gulten Gurbuze ard ziwan ke seba ke îqtîdarê AKPyî bidê war do çîyo ke destê înan ra bêro bikerê û vat: “Ma sey cinîyan azadîye û edalet wazenê. Ma do heqanê cinîyan bîgêrê. Ma do xoverdayîşî xurt bikerê û ser bikewê. Ma pê bawer ê AKP do şêro.”
Bîrsen Orhane zî vat: “Wa rejîmê qesre hol bizano ke pê qefilnayîşê HDPyî nêeşkeno verê ma bîgêro. Ma sey cinîyan do paştî bidê namzeda xo. Ma akerdişê xo bi slogana Jin jiyan azadî kerd. Ma do slogana xo bikirişê meclîsî.”
