Her waxt weçînitisî muhîm bîyê. Hama emser jedena muhîm î. Şarî verra faşîzmî besekene nî weçînitisan de biresê serkewtişê pîlî. Weçînitisê 14ê Gulane rê zaf waxt nêmend. Nî weçînitisî serva şaranê Vakûrê Kurdistan û Tirkiya, taybet ke serva kurdan, cenîyan, gencan, elewîyan zaf muhîm î. Seserra Peymana Lozanî ya ke heqê kurdan kerdî têser û têbin ra kî nejdî bena. Seweta na peymane tol vetene ke nî weçînitisî muhîm î. Verra qirkerdene, talan, zorvajîye, politikayanê lejî yê hukumatî qomo cevabê xo bido.
Weçînitisê serokkomarîye, naye ra tepîya ciwiyayîsode senên qom pîno eskera bikero. Qerar û îradeyê şarî yo zaf çi bivurno. Kurdî bi reyanê xo besekene virnîya dîktatorîye bicêrî. Hetê ra bi riznayena bendî, na rey besekene jedena parlamenteranê xo meclîs de ca bikerî, hetê bînî ra kî na dîktatorîya ewroyîne besekene bireznê.
Kurdî, cenî, gencî û kes ê ke hetê na rejîme ra rastê zorvajîye yeno, kamîya xo nêna naskerdene, qesê xo nêno gosdare kerdene 14ê Gulane de besekene peynîya nê îktîdarî biyarê.
Tewr jede kî cenî yê ke meydanan bi serran o verra hêrişanê AKP-MHPyî tol nêverdanê û her ca de erzenê xo ver, nî weçînitisan de wayirê qese yî. Rejîma AKPyî Peymana Estemolî ra peyser oncîye, verra zorvajîya ser cenîyan tewa nêkerd, virnîya kistena cenîyan kerd ra. Her serre vînenîme çitur heqanê cenîyan cênê binê lingan. 25ê Teşrîna Peyêne de, 8ê Adare de çitur hêrişê cenîyan kenê. Dismenîya verra cenîyan nî rozan de jedena verê çiman der a. Na rejîme wazena cenîyan hepsê mavênê çor desan bikero. Waxto ke cenî tekoşîn danê jedena qarînê. Cenî ya ke bêveng a, cenî ya ke qeseya camêrdan ra nêvejîna wazenê. Bingeyê polîtîkayanê xo de bêkamî kerdena cenîyan esta. Coka qerarê cenîyan, serkewtişêde pîlî ke biyaro. Cenî verra hişmendîya camêrd-dewlete bi vatisê xo yê rengê nî weçînitisan kî tayîn bikerî.
Onca gencî yê ke hetê îktîdarî ra nêne naskerdene, bi reyanê xo besekene virnîya ciwîyayîsî de newe rakerî. Cenî û gencî besekene bi reyanê xo textê hukumdaran bireznê.
Serva şaran 14e Gulane teyna qezançkerdena weçînitisî nîya. Jûbîyayene, verva zilm û zorvajîye, faşîzmî jûbînî rê poştvejîyayene, weşîyade têdûste, ciwîyayîsêde neweyî ronayene ya. Yena manaya haqanê pêro dormeyan naskerdene. Nê weçînitisî de sîstema faşîst û qirkerdoxe ya gonî vîndî bikero.
Îtîfaqê Kede û Demokrasî, yanî raya hîrêyine serva şaran, cenîyan, gencan, karkeran, dewizan, domanan weşîya têdûste de qerarîya xo çond reyî arde ziwan. Raya pêroyinî de bare kerd. Taybet ke erdlerzî ra dima ke qom zî verra polîtîkayanê AKP-MHPyî her ca de hersê xo ano zon. Jûbîn rê wayîr vejîyayî. Na jûbîyayene besekene weçînitisan de kî bimusnê. Terso ke AKP-MHPyî zerrê homete de vila kerd, axme bî. Merdene ra qeyir tewa çîn o. Vesanîye ra qeyir tewa çîn o. Nêverdanê kes fekê xo rakero, jû çekû biyaro ziwan. Desinde bi pêguretena tersnenê ya kî desinde cênê pê. Endî çila xeleşiyayîşî vesena. Raya xo na sîsteme ra xelesnayene zelal a.
Xo ra pers bikerîme, eke kurdî, dormê yê ke xo şoreşger name kenê, dormeyê demokratî nê weçînitisî ra bi serkewtisî nêvejîyayî se beno?
Tewr sifte na rejîme seweta kokê kurdan ardene, pêro rayan û qeweta xo ya hêriş bikero. Qirkerdena kurdan bibo karê bingeyîn yê faşîzmî.
Cenî û gencî yê naye ra tepîya binê destê na hukumdarîye de pûç bibê.
Karkerî yê jedena bibê koleyê na sîsteme. Coka roz roza xeleşiyayîs a. Roz roza xo ver esten a. Roz verra zilm û zorvajîye têhetameyen a. Xo vîr ra mekerîmê, nî weçînitisan de kes o ke nê hukumatî ra bêzar bîyo, kes o ke weşîye ra heta perwerdeyê têdûstî û aştîye wazeno eke reyanê xo rê wayîr vejîno, besekene bi yew reya virnîya qirkerdene kî bicêro. Rejîma faşîste ra bixeleşîyo.
