Hemserekê HDPyî yê Amedî Zeyyat Ceylanî ard ziwan ke Newroze seba kurdan wayîrê girîngîyêka girde ya û wina vat: “Emser ma bi dejê erdlerzî kewenê Newroze. Newroze semedê ma sîmgeyê xoverdayîş û ganîbîyayîşî ya, emser zî do bêro manaya vîrardişî.”

Ceylanî vat: “Newroze semedê kurdan tim destpêkerdişê prosesanê muhîman û bimanayan a. Newroze her serre takvîmê polîtîkî dîyar kena. Kurdan mîyanê serre de çi anto û do biancê kirişenê na roje. Şar û sîyasetê kurdan çîyo ke wazenê bikerî, Newroze rê bar kenê. Emser ma bi dejê erdlerzî kewenê Newroze. Newroze semedê ma sîmgeyê xoverdayîş û ganîbîyayîşî ya, emser zî do bêro manaya vîrardişî. Hêzê serdestî kenê ke prosesê erdlerzî bidê vîrakerdene. Hema dirbetîyî teze yê, coka erdlerz ganî nêro vîrakerdene. Newroze dînamîkanê tewr holan ra yew a.

Ceylanî qiseykerdişê xo rê wina dewam kerd: “Prosesê vîjnayîşê emserî semedê sîyasetê demokratîkî û rêxistinanê komelê sîvîlî zaf çî îfade keno. Proseso muhîm o ke îqtîdarê AKP-MHPyî yo ke wextê ci bîyo de, bêro şawitene. Seba ke no proses hol bêro erjnayene Newroze zaf muhîm a. Na Newroze de semedê ma hîrê çîyê muhîmî est ê. Ganîbîyayîş û têkoşîn bêrê aktuelkerdene, kesê ke erdlerz de merdî bêrê vîrardene û destpêkerdişê prosesê vîjnayîşî yo ke do bi serkewtişî tacîdar bibo.”