Artêşa tirke 12ê Adara 1971î de bîrnameyêk da û hukmat gina waro. Leşkeran bi rayîrê antî-demokratîkî îqtîdar girewt destê xo. No metod ewro zî bi destê hukmatê Erdoganî şuxilîyeno. Şarê Tirkîya û Kurdistanî bi zorî kewtê binê “tabîyetê” Erdoganî.
Serfermandaro pêroyî Memduh Tagmaç, Fermandarê Hêzanê Bejîyan Faruk Gurler, Fermandarê Hêzanê Deryayî Celal Eyîceoglu û Fermandarê Hêzanê Hewayî Muhsîn Baturî 12ê Adara 1971î de TRT de bîrnameyêk îlan kerd. Uca de bikilmî nê “balantişî” ameyî kerdene: “Parlamento û hukmat welatê ma dekeno mîyanê anarşî, pêrodayîşê birayîye, bêasanîyanê komelkî û ekonomîkan. Hêvîya cirestişê daraxê medenîyetî yê hemdemî yo ke Ataturkî ma rê ramojnayo nika qedîyena. Reformê ke qanûnê bingeyî de nîşan dîyenê nênê caardene. Ameyoxê Komara Tirkîya binê tehlukeyî de yo.”
Hukmatê Nîhat Erîmî
Fermandaranê faşîstan hukmato ke bi destê şarî amebî weçînayene çin kerd û serdestîya xo îlan kerde. Na derbe de parlamento nêbedilîya û partîyê sîyasî nêqefilîyayî, têna hukmat avurîya. Parlamenterê CHPyî yê Îzmîtî Nîhat Erîmî bi fermandaranê hêzan pêkerd û serekwezîrîye qebul kerde. Bi nê hawayî hukmatê Suleyman Demîrelî dîya îstîfakerdene û herinda ey hukmatê Nîhat Erîmî 26ê Adara 1971î de ronîya.
Koşkê Zîverbeyî
Îdareyê Erîmî 26ê Nîsane de 11 şaristanan de îdareyo orfî îlan kerd. Êdî hukmê qanûnî de qerarnameyêk bi destê hukmatî vejîyêne. Yew zî mehkemeyê leşkerî yê îdareyê orfî awan bîyî. Yanî hukmatê derbekaran her hêz girewt xo dest. Dima ra mudetê pêgirewtişî ame 15 rojî kerdene. Merdimê pêgirewteyî nêeşkayêne bi avûkatê xo pêvînayîş bikerê. Bi nê hawayî vernîya îşkencekerdişî ameye akerdene. Wextê derbe de baxusus nameyê Koşkê Zîverbeyî deyra “namdar” bî. Merdimanê çepgiran uca de îşkenceyêko gird dî. Na çarçewa de xeylê nimûneyê cîyayî estê. Mîsal Apê Musa zî Koşkê Zîverbeyî de mend. O vîrameyîşanê xo de wina nuseno: “Hucraya mi teqrîben 50 santîm xorînîye de bîye. Gama ke merdim kewtêne zerre, şîyêne cêr. Gama ke ez kewta zerreyê hucra, heta ke serê mi de têna kîlot bimano, ez ameya rûtkerdene. Leşkeran seke mi reyde leqa xo kerdêne, wina vat: ‘Homa to rê asanîye bido’ û dima vejîyayî teber. Badê cû înan her hetê hucra ra pê lulîyanê girdan awa serdine pijiqnaye. Heta serê sibayî yê bînî ez mîyanê a awe de rût û rapal menda… Dima sergeneralêk û hîrê merdimê sîvîlî kewtî zerreyê hucra. General bi bacî ame mi ser û vat, ‘mîjdanîya mi bide, ma cendegê serkonsolosê Îsraîlî dî’. General amade bî ke mi bikuwo, sîvîlanê leweyê ey ra yew wina qisey kerd: ‘Paşayê mi! No Musa Anter o. O kurdperest o… Îsraîl, Berzanî rê hetkarîye keno. Coka no merdim nêeşkeno serkonsolosê Îsraîlî rê xirabîye bikero.’ Cuya mi de reya yewine kurdperestîya mi û Berzanî feydedar bîbî.”
Derba 9ê Adare
Yeno îdîakerdene ke Derba 12ê Adare hemverê hewldayîşê Derba 9ê Adare qewimîyaye. Fikrîyeno ke tayê ofîserê ciwanî yê ke nêzdîyê “şorişê demokratîkî yê neteweyî” bîyî, waştêne derbe bikerê. Tewr zîyade fermandar Faruk Gurler û Muhsîn Baturî zî paştî dayêne înan. La gama ke Derba 12ê Adare qewimîyaye, nî fermandarî derbasê hetê derbekaranê bînan bîyî. Tayê general, amîral û serhengî yê ke paştîdabî Derba 9ê Adare, ameyî teqawutkerdene. Teqrîben 600 ofîser û wendekarê leşkerî artêşe ra ameyî vetene.
Erdogano derbekar
Hişmendîya Derba 12ê Adare ewro zî hetê Tayyîp Erdoganî ra yena dewamkerdene. Nika leşker, polîs, unîversîteyî, dezgehê dînî, hukm xizmetê Erdoganî kenê. O seraya xo de bire dano, leşker vera kurdan hêriş keno. Seraya xo de ferman dano, dozger û dadgerî kurdan erzenê zîndanan. Seraya xo de hutbe dano amadekerdene, camîyan de îmamî wanenê. Rektoran tayînê unîversîteyan keno, ê seba Erdoganî propaganda kenê. Bikilmî Tirkîya de hişmendîya derbekare û dîktatorîye esta.
