Parlamentera Partîya Demokratîke ya Şaran (HDP) a Mûşî Gulîstan Koçyîgîte da zanayene ke erdlerzî ra 3 hewteyî vîyartî la hema zî şar teber ra yo, awa pake çin a û problemê hîjyenî dewam kenê.

Koçyîgîte behsê herêma erdlerzî kerd û wina vat, ‘‘Hetêkî ra bêtera erdlerzî, hetê bînî ra zî bêtera AKP-MHPyî est a. Erdlerzî ra 22 rojî vîyartî la hema xeyme, awe, ceyran û pakîye, sey nînan hewcedarîyê bingeyînî nêameyê safîkerdene. Şarî bi zor xo binê xirban ra vet, la 22 rojî yê ke teber ra yo.’’

‘Îqtîdar dişmenê şarî yo’

Gulîstan Koçyîgîte ard ziwan ke, herêma erdlerzî ra talûkeyê janî est o û wina dewam kerd, ‘‘Xeylê herêman ra nêweşxaneyî rijîyayê û îmkanê tedawîbîyayîşêkê başî nêdekewenê destê şarî. 22 rojî yê ke hema meyîtî binê xirban de yê. 22 rojî yê ke hema xeymî nêameyê vilakerdene û gênê xeyman roşenê. Ma tim vatêne, no îqtîdar dişmenê şarî yo û bi nê erdlerzî no çî reyna ame vînayene. Bi nêweşxaneyanê bajarî pesnê xo dayêne la tewr verê ê rîjîyayê. Ma do hetêkî ra birînanê xo bipêşê, hetê bînî ra zî ma do pîya hesab bipersê.’’