Di saetên nîvro de bi pîleya 5.6 erdhejek bi tund pêk hat. Di erdhejê de 29 avahiyên ku di erdhejên 6’ê sibatê de pêk hatibûn xesar dîtibûn hilweşiyan. Li 5 avahiyan xebatên lêgerîn û rizgarkirinê hatin destpêkirin. Di van avahiyan de Azîz Delîktaş û keça wî Şeyma Delîktaş bi saxî ji bin kavilên apartmana Kardelen a li navçeya Yeşîlyûrtê hatin derxistin.

Hat diyarkirin ku di kavila apartmana 6 qatî ya li Taxa Zaferê de 3 kes hene û hat angaştkirin ku ev her sê kes dema ku avahî hilweşiyaye di wesayîtê de bûne. Xebatên li apartmana Çeçen û apartmana Bûharayê ya li heman taxê jî didomin.

103 birîndar li nexweşxaneyê ne

Wezîrê Tenduristiyê Fahrettîn Koca, der barê erdhejê de daxuyaniyek da û diyar kir ku 103 birîndar li nexweşxaneyê, 5 ji van birine emeliyatê û 3 jî di unîteya beşa lezgîn de ne.

AFAD’ê jî ragihand ku 29 avahî hilweşiyane, 32 kes bi saxî ji bin kavilan hatine derxistin, 110 kes birîndar bûne û li 2 avahiyan jî xebatên rizgarkirinê didomin.

Kesek ku xebatên rizgarkirinê dişopand, diyar kir ku dengê xwe daye AKP’ê û ev bertek nîşan da: “Bila ev destê min bişikesta, min deng da wan. Bila Xwedê belaya min bide, min deng da wan.”