Di ser erdhejên ku di 6’ê sibatê de li navçeyên Bazarcix û Elbistan ên Mereşê bi pîleyên 7.7 û 7.6 pêk hatin re 12 roj derbas bûn. Li herêma erdhejê ji aliyê sazî û dezgehên dewletê ve hê jî birînên mexdûrên erdhejê nehatine pêçandin û gelek pirsgirêk hene. Bi giranî pêwistiyên mexdûrên erdhejê bi starbûn û germbûnê heye. Ji bo vê yekê li herêmê banga kon û êzangên hişk tê kirin.
Li navçeya Hezroyê ya Amedê ev bang ji aliyê şaredariya ku qeyûm tayînî wê hatiye kirin û cerdevanan ve hat îstismarkirin. Li navçeyê di bin navê “piştrgiriya” mexdûrên erdhejê de cerdevanan dest bi talankirina xwezayê kir. Cerdevanên ku li gundê Mezra Celîl ê navçeyê bi makîneyên kar ên şaredariyê rê vedikin û darên ter ên ciwan dibirin, li ser hesabên xwe yên medya sanal (Whatsapp) van kêliyên birîna daran parve kirin.
Di dîmenan de tê dîtin ku komeke cerdevan û xebatkarên şaredariyê li heremeke gund ku berfeke zêde lê bariyaye, bi makîneyên kar ên şaredariyê rê vedikin û xwe digihînin darên ter ên ciwan û bi xîzaran ew dibirin. Her wiha tê dîtin ku hejmareke zêde darên hatin birîn hatine hûrkirin û li ser hev hatine komkirin.
Li aliyê din agahî nehat bidestxistin ku darên hatine birîn ji herêma erdhejê re hatine şandin an na.
