Avûkat Hêjar Nûredîn Kakeyîyî bale ante paştîdayîşê kurdan ser û wina vat: “Ganî hêzê kurdan meseleyanê mabênê xo caverdê, semedê çar leteyanê Kurdistanî bibê yew û çarçeweya neteweyî de bigurîyê.”

Kakeyîyî serewedaritişê Rojhelatê Kurdistanî û Îranî nîşan da û vat: “Serewedaritiş kontrolê hukmatê Îranî ra vejîya, kewt binê kontrolê şorişgêran. Tirkîya de zî hukmat krîz de yo  û goreyê anketan rayê îqtîdarî zaf kêm bîyî. Tirkîya û Îran kenê ke serê krîzanê xo bîgêrê. Erdogan seba ke weçînitiş de ser bikewo, bi polîtîkayanê taybetan krîzan şarî ra nimneno. Seba ke ser bikewo şerê vera kurdan giran keno.

Dişmenê kurdan vera kurdan bîyî yew. La hêzê kurdan eksê ci kenê. Bitaybetî Başûrê Kurdistanî de destkewteyî binê tehlukeyî de yê. Operasyonê sîyasî û leşkerî yê dewleta tirke yê vera Başûrê Kurdistanî destkewteyanê Başûrî erzeno tehluke. Eceb o ke hukmatê Başûrî na raştîye nêvîneno û fam nêkeno. Beno ke destkewteyê Başûrî şewêke de çîn bibê. Nimûneyêkê nê 16ê teşrîna verêna 2017î de ame ciwîyayene. A roje ma dî ke mîyanê 24 saetan de nîmeyê herra Başûrê Kurdistanî kewt destê hêzanê Iraqî.”

Kakeyîyî qiseykerdişê xo wina dewam kerd: “Eke Tirkîya, Îran û Iraq pê bikerê, tehlukeyê çînbîyayîşê destkewteyan zaf gird o. Ganî hêzê kurdan meseleyanê mabênê xo caverdê, semedê çar leteyanê Kurdistanî bibê yew û çarçeweya neteweyî de bigurîyê. Eke hêzê kurdan bibê yew eşkenê hêrişanê vera kurdan û Kurdistanî betal bikerê.  Senî ke dişmen kurdan cîya nêkeno, ganî kurdî zî xo mîyanê xo de cîya mebê, verê hêrişan bêrê têhet.”