Serrêke verî 20ê çeleyê 2022yî de vera Zîndanê Sînaa yê Hesekê yo ke tede cergê DAÎŞî tepişîyenê MÎT û DAÎŞî pîya hêriş kerdbî. Endama Fermandarîya Pêroyî ya QSDyî Newroz Ehmede derheqê tehqîqatê hêrişî û agahîyanê serê hêrişî de ANFyî rê qisey kerd.

Cerganê Zîndanê Sînaa yê Hesekê îtîraf kerd ke hêrişo 2022yî bi plansazîya payeberzanê MÎT û lîderanê DAÎŞî ameyo kerdene.

Fermandare Newroz Ehmede pare kerd ke hêrişê Zîndanê Sînaa hetê payeberzanê MÎTî ra ameyo plankerdene û vat: “MÎTî bi xo planê sewqîyatê cergan û cebilxaneyî kerd. Yanî hêriş têna hetê DAÎŞî ra nêame serûberkerdene. Nê planî de gama Iraqî zî est bîye. Seba ke tepişteyan de têkilîye bêra ronayene telefonî ameybî dekerdene zereyî. Reyna nêzdîyê zîndanî de hucreyî ameyî cakerdene. Cerganê tepişteyan planê xo îtîraf kerdbî. Goreyê îtîrafanê înan plan hetê tay kesan ra zanîyayêne. Cergê ke teberî ra ameybî, planî ra hayîdar bîyî.

Ma dormeyê zîndanî de tedbîrê xo girewtbî. Verî zî ma zereyê zîndanî de operasyonî kerdbî. Xora tay noqtayan de kêmasîyê ma est bîyî. Asayîşê zîndanî perwerde girewtbî la qîm nêbî. Seba ke îmkanê ma zî tay bîyî ma nêeşkayî tedbîranê xo zixm bikerê. Bara nê cerganê tepişteyan ha milê Îdareyê Xoserî û QSDyî de ya. Hêrişî ra dima cergê tepişteyî sewqê zîndanê neweyî bîyî. La na bîna newe biba zî hetê asayîşî ra kêm manena. Cergê DAÎŞî zî zanenê ke îmkanê ma tay ê û ma tedbîranê laziman nêeşkenê bigêrê. Ganî her welat cerganê xo bigêro û muhakeme bikero.

Zîndananê ma de cergê hemwelatîyanê 50 welatan est ê. Her welat nêwazeno nê cergan bigêro. Hetê bînî ra herêma ma de zîndanê cergan zaf ê la vera înan gefê hêrişî dewam kenê. Tewr peyên Reqa de hêrişo winayên amebî kerdene. Seba ke verê nê hêrişan bêro girewtene ganî pêro hêz û welatî mesuldarîyanê xo bîyarê ca.

Hema zî tehqîqat û îfadeyê cerganê tepişteyan dewam kenê. Xebatê ma hema zî dewam kenê. Ma resayî tayê netîceyan la hema zî tayê detayî eşkera nêbîyî.”