Operasyonê Birûska Cizîrê yo ke vera DAÎŞî virazîya heman wext de xeylêk planê hemkarîya dewleta tirke û DAÎŞî zî eşkera kerdî.
ANFyî ra Mustafa Çobanî derheqê operasyonî de wina nuşt:
Operasyon de heta nika netîceyê girîngî ameyî destvistene, verê xeylêk hêrişanê DAÎŞî ameyî girewtene. Roja diyîne de 52 cergî tepişîyayî û nînan ra yewî îtîraf kerd ke înan plan kerdêne ke şayîyanê serra newîye de hêriş bikerdêne. Heta nika operasyon de 184 cergî û hemkarê înan tepişîyayî.
Fermandara Herêma Cizîre ya YPJyî Dilbirîne Kobanê koordîneya operasyonî de cagêna. Fermandare Dilbirîne derheqê operasyonî de wina vat: “Hêrişê dewleta tirke firsend danê DAÎŞî ke têbigêro. Bi nê hawayî dewleta tirke paştî dana DAÎŞî. Cergê DAÎŞî plan kenê ke hêrişanê dewleta tirke reyde hêrişê herême bikerê. Dima ke herême de gefê DAÎŞî zêdîyayî ma dest pê nê operasyonî kerd. DAÎŞî seba ganîbîyayîşî hêrişê Reqa kerd. Ma seba ke qesasê şehîdanê xo bigêrê dest pê nê operasyonî kerd.
Operasyonê ma berdewam o. Ma heta nika netîceyê girîngî vistî destî û derheqê nînan de rojanê verê ma de do agahîyan bidê şarî. Cerganê tepişteyan îtîraf kerd ke nînan do serra newîye de hêriş bikerdêne. Ma verê nê qirkerdişî girewt. Cayê operasyonî herêmêka stratejîk a. DAÎŞî teyna na herême de ney herêmanê bînan de zî amadekarîyê hêrişan kerdêne. Operasyonê Birûska Cizîrê verê nê gefan girewt.”
Berpirsîyarê Çapemenîye yê QSDyî Ferhad Şamîyî zî vist vîrî ke têkoşînê vera DAÎŞî bêmabên dewam keno û îfade kerd ke dewleta tirke bi hêrişanê xo verê DAÎŞî akena. Ferhad Şamîyî zî derheqê operasyonî de wina qisey kerd: “Hêrişê vera Zîndanê Hesekê ra nata ma zanayêne ke DAÎŞ amadekarîya hêrişan keno. Xora DAÎŞî dima hêrişê Reqa kerd. Dewleta tirke zî pê hêrişanê xo kerd ke DAÎŞ newe ra gandar bikera. Ma agahîyî girewtî ke DAÎŞ do Hesekê, Kampa Holî û Qamişlo de hêrişan bikero. Ma nika ra no operasyon kerd û verê cergan girewt. Nê operasyonê ma kerd ke şarê ma bi aramî debikewo serra newîye.”
Fermandaranê operasyonî ra Hêlîn Resûle vat: “Cergê DAÎŞî xo keyeyanê sivîlan de nimnenê coka operasyon bi hesasîyetêkê pîlî yeno kerdene. Wexto ke ma erzenê keyeyan ser cinî û domanan benê odayêka bîne û dima cigêrayîş kenê. Şarê ma zî bi nê têgêrayîşê ma beno zerrîrehet. Ma serra newîye de wezîfeyê xo kerdî. Seba asayîş û aramîya şarê herême ma do tim wezîfeyê xo bikerê. Wa zerrîya şarê ma rehet biba.”
