Vervatoxa Meclîsê Cinîyan ê HDPyî Ayşe Acar Başarane îqtîdaro tekperest rexne kerd û wina vat: “Serra 2023yî do biba a serre ke ma do îqtîdarê faşîst, tekperest û dişmenê cinîyan bin bivisnê.”

Vervatoxa Meclîsê Cinîyan ê HDPyî Ayşe Acar Başarane bînaya Amedî ya DBPyî de derheqê rojdemî de qisey kerd.

Başarane bale ante persa cinîye û wina vat: “2022 seba cinîyan hem serra têkoşînî hem zî serra zehmetîyan bîye. 2022 de bi şîarê ‘Jin, Jiyan, Azadî’ qetilkerdişê Jîna Emînî ra dima Rojhelatê Kurdistanî û Îran de serewedaritişê cinîyan dest pêkerd. 2022 de Tirkîya û Vakurê Kurdistanî de dişmenîya îqtîdarê AKP-MHPyî ya vera cinîyan dewam kerd û bi fermanêkî Peymana Stenbolî ameye betalkerdene. Welat de polîtîkayanê bêcezaverdişî ra şîdetê vera cinîyan zêdîya û 2022 de tewr tay 310 cinî hetê camêrdan ra ameyî qetilkerdene. Cinîyî 25ê Teşrîna Peyêne de vera şîdetî vejîyayî meydanan û reyna raştê şîdetî ameyî. La rixmê nê hêriş, operasyon û destbendkerdişan zî cinîyî payan ser de yê.”

Başarane qiseykerdişê xo rê wina dewam kerd: “Tecrîdê girankerdeyî ra bi mengan o ma nêeşkenê Birêz Ocalanî ra xeberêke bigêrê. Embazê ma vera tecrîdî hê verê Wezîrîya Edaletî de nobete gênê. Partîya ma seba pêvînayîşê bi Ocalanî muracat kerd la Wezîrîya Edaletî cewabêk nêda ma. Heta ke netîce bigêrê ma do Nobeta Edaletî rê dewam bikerê. Çunke tecrîd bingeyê pêro meseleyan o. Heta ke tecrîdê vera Birêz Ocalanî bêro wedaritene nobeta ma do dewam bikera. Serra 2023î do biba a serra ke ma do îqtîdarê faşîst, tekperest û dişmenê cinîyan bin bivisnê.Têkoşînê ma xora do 2023 de zî dewam bikero. Ma pêro şaranê xo yê serra newîye de azadîye û aştîye wazenê.”