Bajarê Dehgulanî ya Rojhelatê Kurdistanî de Şademan Ehmedo ke 8ê kanûne de ame destbendkerdene, pê îşkenceyî ame qetilkerdene.

Goreyê xebera Ajansê Mezopotamya Ehmedîyo ke ame berdene Qereqolê Polîsan ê Meydanê Saetî saetanê şanî de cenazaya ci tira vejîyaye. Dîya zanayene ke Ehmed seba ke raştê îşkenceyê wehşîyî ame, dinayaya xo bedilnaye.

Dewleta Îranî pê nê zî qîm nêkerd, keyeyê ci rê zext kerd ke wa cenaza şewe bêro definkerdene.

Goreyê aktîvîstanê heqanê merdiman 16ê êlule roja destpêkerdişê çalakîyan ra nata tewr tay 8 kurdî hetê hêzanê dewlete ra ameyî remnayene û pê îşkenceyî ameyî qetilkerdene.

Hêzanê dewleta Îranî reyna wextê çalakîyanê protestoyî yê Rojhelatê Kurdistanî de zî bi desan kesî qetil kerdî û bi seyan kesî destbend kerdî.