Rêvebera Odeya Endezyarên Înşaatê (ÎMO) ya Rihayê Bahar Hezer di 3’ê kanûnê de li navenda Rihayê ji aliyê birayê xwe ve hat kuştin. Yekitiya Odeyên Endezyar û Mîmarên Tirk (TMMOB) ji bo Hezer li Riha û Mêrdînê daxuyanî dan û kuştina Hezer a ji aliyê birayê wê ve şermezar kirin.
Riha
Li Rihayê, nûnerên rêxistinên jinan, Platforma Ked û Demokrasiyê, endamên TMMOB’ê li ber avahiya Şaxa ÎMO’yê ya Rihayê daxuyanî dan. Rêvebera Odeya Plansazên Bajêr a Rihayê Elîf Erdem, di daxuyaniyê de axivî û diyar kir ku yên jinan qetil dikin bêceza dimînin û ev yek cesaretê dide kujeran û ev tişt got: “Em dizanin qetilkirina jinan ne pirsgirêkek takekesî, lê civakî ye û tundiya li ser jinê polîtîk e. Erdem anî ziman ku wê têkoşîna wan a li dijî polîtîkayên li dijî jinê bidome. Piştre li hundirê avahiya ÎMO’yê ji bo Bahar Hezer bîranîn pêk hat.
Mêrdîn
Desteya Koordînasyona Bajar a Mêrdînê ya TMMOB’ê jî li avahiya xwe daxuyanî da û Bahar Hezer bi bîr anî. Rêvebera Odeya Endeyzarên Înşeatê ya Mêrdînê Mizgîncan Dînç Arsû, di daxuyaniyê de axivî û destnîşan kir ku hempîşeya wan Bahar bi awayekî hovane hatiye kuştin û ew ne edaleta derewîn lê edaleta rasteqîn dixwazin. Arsû da zanîn ku ew ê li dijî her cureyê tundiya li ser jinan derkevin û jinan bêxwedî nehêlin.
Daxuyanî bi dirûşmeya “Jin jiyan azadî” bi dawî bû.
