Endama Heyetê Rayraberdişî yê Baroyê Amedî Cemîle Turhalli Balsake ard ziwan ke îqtîdar heqanê bingeyî yê merdimî nêgêno binê temînatî û wina qisey kerd “Têna îqtîdar nê yew muxalefetê xurtî zî nêvîneno. Coka şar mecbûr maneno ke welatî ra vejîyo.”

Endama Heyetê Rayraberdişî yê Baroyê Amedî Cemîle Turhalli Balsaka ke ANFyî rê qisey kerd vat ke huqûqo ke semedê rehetkerdişê cuye yo, inkey sey çuyeyê îqtîdarî yeno şuxilnayene.

Balsake pare kerd: “Dewlete berpirsîyar a ke heqanê bingeyênan ê şarî bipawo. No semedê hemwelatîyan zî yew heq o, la roja ma de huqûq herinda pawitişê merdimî de ey hîna zaf fîneno tengayî. Huqûq inkey sey çuyeyê îqtîdarî yeno şuxulnayene. Merdim mîyanê sîstemî de binê zextî de yeno helnayene. Dewlete tim hêrişê heq û azadîyeyan kena. Komel yewbînî ra yeno cîyakerdene.”

Balsake qiseykerdişê xo rê wina dewam kerd: “Qanûnê bingeyî têna qale de est o. No tewr zaf cografyaya kurdan de binpaykerdişê heqan de yeno vînayene. Heqê bingeyî cografyaya kurdan de sey rayîrê cezakerdişî yê. Qanûne bingeyî bi xo açarîyayo rayîrê cezakerdişî. Coka hemwelatî xo azad hîs nêkeno. Vîneno ke îqtîdar heq û azadîyanê ci yê bingeyî nêgeno binê temînatî. Têna îqtîdar nê yew muxalefetê xurtî zî nêvîneno. Coka şar mecbûr maneno ke welatî ra vejîyo. Dewlete pê polîtîkaya hêrişkare komelî ser o tesîr kena. Ekonomî û sîyaset zî binê tesîrê ci de manenê. Cayo ke tede azadîye çînbo xora refahê ekonomî zî çîn o. Krîzê îqtîdarî tesîrê krîzê ekonomîk û polîtîkî zî keno. Şar seba ke bêhevî yo verê xo dano teberê welatî.”