Rejîmê Erdoganî yo terorîst şaristananê Rojawanî yê sey Kobanê, Dêrik, Şehba, Efrîn, Minbic, Hesekê, Qamişlo de çend rojî yo hêrişanê hewayî keno. Şarê Rojawanî qir keno û cayanê sey nêweşxane, wendegeh dano bombayan ver.
Hêzanê mîyanneteweyîyan ê ke seba Ukrayna rayaumûmîye viraşte û hetkarîya girde daye serekê ci Zelenskîyî, derheqê hêrişê Tirkîya de veng nêvejenê. Vernîya çimanê dinya de qetlîyam heta jenosîd yeno caardene. Nê qetlîyamî de bitaybetî reftarê Rûsya û Amerîka zaf yeno nîqaşkerdene.
Îşxalê Rûsya
Rûsya 24ê sibata 2022î de Ukrayna de dest pê şerê gonînî kerd. Bajarî dayî bombayan ver û tayê îşxal kerdî. Bi mîlyonan ukraynayijî welatê xo ra vejîyayî. Bi hezaran kesî ameyî qetilkerdene. Hema zî Rûsya bajaranê Ukrayna ser o roketan varnena. Bi zorkarîye wazena Ukrayna îşxal bikera, la warê şerî de panorama bedilîyena. Bi hetkarîya welatanê rojawanî artêşa Ukrayna aver şina. Rûsya cayanê îşxalkerdeyan game bi game ca verdena. Rixmo ke rejîmê Putînî general Surovîkîn ard serê cepheyê Ukrayna, apeyancîyayîş mecburî bî. Bi nê hawayî artêşa Rûsya oblastê Hersonî ra apey ancîyaye. Eke wina dewam keno, oblastê sey Zaporîjya, Donetsk û Lugansk destê Rûsya ra zî vejîyenê. Nika dîktator Putîn nê xeterî vîneno û wazeno îdareyê Zelenskîyî reyde peymane bikero. Labelê Ukrayna nêzdîyê peymane nêbena. A wazena herranê ci bîgêra binê kontrolê xo.
Putîn zî mesuldar o
Welatanê rojawanî rîyê şerî ra vera Rûsya tayê hêzê caardişî yê petî kerdî. Nêzdî 800 fîrmayî bazarê Rûsya ra vejîyayî. Putîn hem hetê ekonomî hem zî hetê leşkerî ra binê “abluqa” de yo. Nê semedî ra îdareyê Erdoganî çimê ey de “xelasker” o. Putîn seba menfeatanê xo Tirkîya sey hacetî şuxilneno. Erdogan zî hewcedarê hukmatê Putînî yo. Çike weçînitişî estê. Ey seba weçînitişan hêrişê Rojawanî kerd û Putînî ra hetkarîye girewte. Eke Rûsya warê hewayî nêakerdêne, artêşa tirke şaristanê Rojawanî nêdayêne bombayan ver. Yanî îdareyê Putînî şerê vera Rojawanî de mesuldar o. Çend rojî verî heyetê Rûsya, Tirkîya û Îranî Astana de ameyî têhet. Temsîlkaro taybet ê Sûrîye yê Rûsya Aleksandr Lavrentyevî têna Tirkîya rê tayê “pêşnîyazê sembolî” kerdî.
Amerîka îxanet kena
Hêrişê hukmatê Erdoganî de yew hêzo mesuldaro bîn Amerîka ya. Rixmo ke Amerîka vana “Îdareyo Xoser ê Rojawanî hevalê min o”, her tim ci rê îxanet kena. Wextê serekîya Donald Trumpî de artêşa tirke hêrişê vera Girê Sipî û Serêkanî kerd. Îdareyê Trumpî ci rê destûr da û kardî sanaye piştîya hevalê xo. Nê hêrişê peyênî de zî îdareyê Joe Bîdenî bêveng maneno. Wezaretê Pawitişî yê Amerîka eşkerayîyêke kerde û zafî “hêzanê asayîşê” xo de eleqedar bî. Vervatoxê wezaretî Patrick Ryderî bi hawayêkê akerdî hêrişê Tirkîya şermezar nêkerdî.
Ewropa dirîyîye kena
Welatê Ewropa zî dirîyîye kenê. Hetêk ra Ukrayna de vera Putînî hêzanê caardişî kenê û hêrişê ey asteng kenê, hetekê bînî ra Rojawan de vera hêrişê Erdoganî “goşhîrayîye” kenê. Çimanê Ewropa de Erdogan merdimo “hol” o. Her ke kurdan qir keno, her ke bajaran dano bombayan ver Ewropa bêveng manena.
