Vîrusê Korona (Covid-19) ke bajarê Çînî yê Wuhanî de vejîya raşte û hema hema vilayê pêroyê dinya bî, heme aktîvîteyî da vindetene. Her çiqas ke hetê Wezîrîya Weşî ragamê normalbîyayîşî bêro eştene zî xeylê zanayî ekse ci fikirîyenî û vanî ke ganî nê gamî tayna bêrî taloqkerdene ke gama diyîne yê janî nêvirazîyo.
Vejîyayîşê vîrusî ra dima hewl dîyeno ke heme xebat, aktîvîte û çalakîyî keyeyan ra bêrî domnayene. Înan ra yew zî perwerde yo. Badê vîrusî Komeleya Cigêrayîşî ya Kurdî semedê wendekaran perwerdeyê onlinî yê ziwanê kurdî daye destpêkedene ke kesê ke wazenî ziwan bimusî rê vîrus asteng nêbo.Na çarçewe de mamostayê ziwanê kirmanckî Hecî Sayin qala xebatan, programêzimanê kurdî, eleqeya seba kirmanckî û gamê normalbîyayîşî de do xebatê înan senî dest pêbikerî,kerd.
‘Eleqaya şarî xeylê bî’
Mamostayê kirmanckî Hecî Sayinî destpêkê qiseykerdişê xo de da zanayene ke seba kurmanckî û kirmanckî eleqaya şarî xeylê bî ê dest bi dersanê onlinî kerdî û wina va: “Ma sey Komeleya Cigêreyîşan ê Kurdî badê ke vîrûs vila bi û karantîna dest pê kerd seba ke wendekarê ma û şarê ma hetê perwerdeyê ziwanî ra nêkewê tengayîye ma dersê online dayî destpêkerdene. Hem seba kurmanckî û hem zî seba kirmanckî eleqaya şarî xeylê bî. Mîyanê çend saetan de 1045 kesan seba kursan muracat kerd. Nînan ra 145 kesî seba kirmanckî bîy.”
‘Nika dersê ma dewam kenê’
Sayinî dewamê qalîkerdişê xo de dîyar kerde ke Ewrupa û heme hetê welatê ra milet semedê ziwanê kurdî muracat kerdîbî û bale ant programê dersan ser o ûdomna: “Hema hema her ca ra muracatî estbî. Ewrupa û heme hetê welatê ra milet muracat kerdîbî. Ma zî goreyê duştê nê kursîyeran di duştî dîyar kerdî. Duştê yewinî de ê ke qet kirmanckî nêzanê ê ders vînenê. Duştê diyinî de zî ê ke kirmanckî zanê la wendiş û nuştişê înan kêm o ê ders vînenê. Ma hewte de hîrê rojan dersan danê. Roja sêşeme û yene dersê duştê yewinî, roja pancşeme zî dersê duştê diyinî esto. Nika dersê ma dewam kenê û nêzdî 60 kesî beşdarê dersan benê. Ma dersan bernameyê Zoomî ser o danê.”
‘Her ca ra kursîyerê ma estê’
Sayinî cewabê persê ‘Gamê normalbîyayîşî de do xebatê înan senî dest pêbikerî?’ da û wina dewam kerd: “Heta demêko derg normalbîyayîş mumkin nêaseno. Ri bi ri perwerde zî zaf mumkin nîyo. Ma zî fikirîyayî ke perwerdeyo onlîne îmakananê neweyan mojneno ma. Bi dersanaê onlinenan ma şênê xo biresnê xeylê kesan û xeylê kes zî şêno nê îmkanan ra fayde bivîno. Mesela kursanê ma de Sîne ra bigêre heta Almanya, Kirmaşan ra bigêre heta Îstanbulî kursîyerê ma estê. Nê semedan ra, ma vat ke ma dersanê onlinenan bidomnî.”
‘Bêrî ma ziwanê xo bimusî’
Sayinî tewr peynî semedê ziwanê kurdî veng da û wina qedêna: “Nika ma reyna dersanê online danê destpêkerdene. Dersê ma 1ê Hezîrane de dest pê kenê. Seba nê dersan zî heta nika 249 kesan seba kirmanckî muracat kerdo. Ez vana ke, rast o vîrusî cuya ma taye teng kerde. La hetê musayîşê ziwanê ra firsendêko baş da ma. Êdî ma kotî de bibî zî muhîm nîyo. Seba musayîşê ziwanê tena yew xetê înternetî û bernamayê zoomî ma rê bes o û ma vanê ke bêrî ma pîya ziwanê xo bimusî û ziwanê xo aver berî.”
