Sekretera Pêroyî ya KCDPDyî Fîdan Ataselîme pare kerd ke îqtîdaro sîyasî qetilkerdişê cinîyan teşwîq keno û bi Qanûnê Sansurî vengê cinîyan yeno birnayene.

Îran û Rojhelatê Kurdistanî de çalakîyê ke qetilkerdişê Jîna Emînî ra dima dest pêkerdbî dewam kenê. Stenbol de zî serkêşîya Komeleya ‘Ma Do Verê Kişîyayîşê Cinîyan Bigêrê’ (KCDPD) de seba paştdayîşê cinîyanê Îran û Rojhelatê Kurdistanî nawnayîşî yenê kerdene.

Sekretera Pêroyî ya KCDPDyî Fîdan Ataselîme derheqê babete de ANFyî rê qisey kerd.

Ataselîme ard ziwan ke Tirkîya de tay kesî rejîmê mollayan ê Îranî xo rê sey nimûne gênê û îsbatê ney zî polîtîkayê dişmenîye yê vera cinîyan ê. Ataselîme da zanayene ke proseso tehlukeyin bi betalkerdişê Peymana Stenbolî dîyayo destpêkerdene û bi qedexekerdişê konseran dewam kerd.

Ataselîme vat: “Mîyanê komelî de beşêk est o ke dişmenîya cinîyan keno. Goreyê înan cinîyî ancax eşkenê sey koleyanê camêrdan biciwîyê. Xîretê qefilnayîşê komela ma zî parçeyêkê ney o. Îqtîdaro sîyasî hêzî dano camêrdan û qetilkerdişê cinîyan teşwîq keno. Qanûnî yenê binpaykerdene. Nika zî bi Qanûnê Sansurî yeno waştene ke vengê cinîyan bêro birnayene. Rixmê nê kerdişan zî cinîyî xoverdayîşê xo rê dewam kenê. Dima ke no îqtîdar şoro zî her çî xora do sereraşt nêbê. La rewşe do hîna holêr biba. Ma hînî wazenê bi hawayêkê azadî biciwîyê û kes do nêeşko verê ma de bibo asteng.”