Tirkîyaya ke bi DAIŞî wayîrê têkiliyanê xorîyan a ci rê merdiman peyda kena. Tayê endamê rêxistine ke bi destê hukmatê tirkî tewrê DAIŞî bîyî zaf çî eşkera kenê. Eyşe Selîma turkîstanije serra 2014î de bi 3 domananê xo remaye Tirkîya. Tîya de nêzdîyê 2 serrî mende û serra 2016î de pê domanan şîye Reqa. Dima tewrê DAIŞî bîye. Uca de bi endamêkê kokimî yê rêxistine zewicîyaye. Eyşe Selîme derheqê prosesê tewrbîyayîşê xo wina qisey kena: “Tirkîya de xeylê turkîstanijî ciwîyenê. Seba ke înan bişirawê Sûrîya Tirkîya de tayê cemaetî û dezgehî estê. Idlîb de zî cemaetê winayênî estê. Seba ke ez şêrî Sûrîya turkîstanijêkî ez gêra. Ez nêzana ey çara hûmara telefonê mi girewtbî. Mi rê vatêne Sûrîya de banê bêpereyî estê. Ey vatêne ‘şorê dewleta Îslamî’. Xora zaf kesî seba şehîtbîyayîşî ameyêne Sûrîya.”
‘Xeymanê ma veşnenê’
Eyşe Selîme nika kampa Holî de manena. Selîme derheqê şertanê kampe de wina qisey kena: “Cuya kampe xeylê çetin a. Mi xo vîr ra kerd ke lepikanê xo bîyara. Destê mi akerde yê. Nika cinîyî pêro qayîtê destanê mi kenê. Tîya de cinîyî vera ma teda kenê. Eke ma hetê înan de nêbê yan sey înan nêciwîyê o wext xeymanê ma veşnenê. Ma pêro mecburî yê ke çarşefa sîyaye pêgêrê û goreyê şerîatî têbigêrê.”
‘Sînor de raştê leşkerî nêameyî’
Cinîya bîne Elbîna Ebdulselam Ebdullahe ya ke Rûsya ra ya derheqê şîyayîşê xo yê Sûrîya de wina vat: “Ez, mêrde û domanê mi tede serra 2016î de Rûsya ra pê teyara ameyî Tirkîya. Ma Tirkîya ra zaf asan derbaz bîyî Sûrîya. Sînor de qet raştê leşkerî nêameyî. Ma xeylê wext Tirkîya de mendî.”
‘Ma nêwazenê tîya de bimanê’
Elbîna Ebdullahe wayîrê 3 domanan a. A zî kamp de raştê persgiran yena. Ebdullahe wina pare kerd: “Mabênê ma cinîyan de her tim persgirî estê. Ê ma sûcdar kenê ke ma dewleta Îslamî ra vejîyayî. Ma nêwazenê tîya de bimanê. Domanê mi tîya de perwerde nêgênê. Domanê ke kamp de yê rê kiştişê merdimî û îşkencekerdişî musnenê. “
Îstîhbaratê Tirkîya bi DAIŞî
Mabênê hukmatê tirkî û DAIŞî de her tim têkilîyê xorî estbî û hema dewam kenê. Xora çend serrî verî Îlyas Aydinî (Ebu Ubeyde) yanî emîrê DAIŞî yê Tirkîya ame destbendkerdene û ey her çî îtîraf kerdbî. Ey vat ke temsilkaranê DAIŞî bi îstîhbaratê Tirkîya (MÎT) tayê kombîyayîşî kerdî.
Mîsal qetlîyamanê Pirsûs û Anqara ra verî wirdî terefî ameyî têhet. Yeno vatene ke hukmatê tirkî qestî vernîya nê qetlîyaman nêgirewte. Oncîna goreyê îtîrafanê Aydinî Tirkîya de grûbêka bi nameyê “mektebil türki (masaya tirke)” esta û na grûbe DAIŞî reyde wayîrê têkilîyanê îdeolojîkan a. Rixmo ke îstîhbaratê Tirkîya na grûbe zanena, asteng nêkena.
‘Cergî ameyî tedawîkerdene’
Derheqê cerganê nêweşan yê DAIŞî de zî çend serrî verî tayê xeberî vejîyaybî. Mîsal Mersîn de hemşîrayêke wina qisey kerdbî: “Çi wexto ke Sûrîya ra xeylê merdimê dirbetînî yenê ardene nêweşxane. Ez hayîdar bîya ke nê dirbetinê peyênî leşkerê DAIŞî yê. Ez zaf xemgîn bîya. Seba ke mi nê merdimî tedawî kerdî zaf şerm bî.”
